उरूस, 26 ऑगस्ट 2021
उसंतवाणी- 151
(ंपंजाब कॉंग्रेसचे प्रदेश्याध्यक्ष नवज्योत सिंग सिद्धू यांचे सल्लागार मलविंदर सिंग माली यांनी एक विचित्र वक्तव्य करून वाद अंगावर ओढून घेतला. कश्मिर हा स्वतंत्र प्रदेश आहे. त्यावर भारताचे अवैध कब्जा केलेला आहे. त्यावरून गदारोळ उठला आहे. त्यांच्यावर अजूनही काही कारवाई कॉंग्रेसने केलेली नाही.)
पंजाबी कॉंग्रेसी । ‘माली’ याचा किस्सा ।
कश्मिर ना हिस्सा । भारताचा ॥
कश्मिर म्हणजे । देश हा स्वतंत्र ।
दादागिरी तंत्र । भारताचे ॥
ऐसा दिव्य मेंदू । सिद्धू सल्लागार ।
करू बघे गार । स्वपक्षाला ॥
देशद्रोही बोल । कॉंग्रेसींची खोड ।
चाले चढाओढ । बोलभांड ॥ 4॥
‘मणीशंकर’नी । ‘दिग्विजय’ ‘शशी’।
यांनी केली काशी । स्वपक्षाची ॥
बोलायचे तेंव्हा । संसदेत गप्प ।
करू म्हणे ठप्प । कामकाज ॥
कांत अविचारी । जीभ यांची सैल ।
बुद्धीचा हो बैल । दिसतसे ॥
(24 ऑगस्ट 2021)
उसंतवाणी- 152
(मुख्यमंत्र्याच्या कानाखाली काढली असती असे वाक्य नारायण राणे यांनी कार्यक्रमात वापरले. तेवढ्या एका वाक्यावर त्यांच्या विरोधात गुन्हा दाखल करून त्यांना अटक करण्यात आली. शिवसेनेने म्हणजेच आघाडी सरकारने अर्णब गोस्वामी प्रकरणासारखीच ही चुक करून ठेवली आहे. जी त्यांच्यावरच शेकण्याची शक्यता जास्त आहे. )
सत्ताबळे माज । लागली चटक ।
राणेंना अटक । केली असे ॥
कंगनाचे घर । ऐसेची पाडले ।
अर्णवा धाडले । तुरूंगात ॥
‘उखाड दिया’ हे । सामना हेडिंग ।
सत्तेमुळे झिंग । चढलेली ॥
उडते भुवई । संजय उवाच ।
लिहितो उगाच । सामन्यात ॥
मिळे न्यायालयी । सर्वौच्च थपडा ।
रिता यांचा घडा । कायद्याचा ॥
राणेंना मिळता । जामिन सत्वरे ।
अब्रुची लक्तरे । निघतील ॥
कांत कोण यांचा । विधी सल्लागार ।
बुद्धीने जो पार । मतीमंद ॥
(25 ऑगस्ट 2021)
उसंतवाणी- 153
(महाराष्ट्रभर शिवसैनिकांची हाणामारी करत आपल्या राडा संस्कृतीचे दर्शन घडवले आहे. यावर कुठलीही कायदेशीर कारवाई तातडीने होताना दिसत नाही. )
महाराष्ट्रभर । सेना ‘ठोक’तंत्र ।
सैनिक स्वतंत्र । मारण्यासी ॥
सत्ताधारी करी । रस्त्यावर राडा ।
कायद्याला गाडा । सत्तेखाली ॥
हप्ते आणि राडा । हाची मुळ गुण ।
येई उफाळून । वेळोवेळी ॥
राणे नी उद्धव । पांडव कौरव ।
युद्धाचा गौरव । आपसात ॥
घड्याळ नी हात । लांबुन बघती ।
मनात हसती । यादवीला ॥
कुणी का जिंकेना । हारणार ‘युती’ ।
हीच भानामती । बारामती ॥
कांत आपसात । भांडती खुशीत ।
शत्रुच्या कुशीत । बसुनिया ॥
(26 ऑगस्ट 2021)
श्रीकांत उमरीकर, जनशक्ती वाचक चळवळ, औरंगाबाद 9422878575
अटक केली ही तालीबानी वृत्ती आहे. यांना आता टीकाही सहन होईना. उलट पप्पू ने संसदेत मोदींना मारण्याची भाषा केली होती; तेव्हा मोदींनी शब्दाने उत्तर दिले होते.
ReplyDelete