उसंतवाणी - राजकीय उपहास- भाग ७२

 

उरूस, 28 ऑक्टोबर  2021 

उसंतवाणी- 214

(शरद पवारांनी मुंबई मराठी ग्रंथ संग्रहालयाच्या अध्यक्षपदाची निवडणुक लढवली. 29 वि. 2 मतांनी त्यांनी ती जिंकली. पवारांचा साहित्याशी काय संबंध? ही संस्था तरी त्यांनी स्थापन केली का? )

ग्रंथप्रेमी काका । दाविती उमाळा ।

राजकिय चाळा । नका म्हणू ॥

या मराठी ग्रंथ । संग्रहालयाची ।

बिल्डिंग मोक्याची । योगायोग ॥

ग्रंथप्रेम शुद्ध । ध्यानी ना भुखंड ।

कोण तो श्रीखंड । उपहासे ॥

जुनी इमारत । व्हावी डेव्हलप ।

हेतू शुद्ध खुप । बघा जरा ॥

गगनचुंबी ही । होता इमारत ।

साहित्य प्रगत । होणारच ॥

ग्रंथासाठी मस्त । ए.सी. करू खोली ।

कोपर्‍यात खाली । कुठेतरी ॥

कांत दिसतो हा । ग्रंथ मकबरा ।

तोंडात तोबरा । विद्वानांच्या ॥

(26 ऑक्टोबर 2021)

उसंतवाणी- 215

(कश्मिर भारतात सामील झाला तो दिवस म्हणजे 27 ऑक्टोबर. या दिवसाला पाकिस्तानात काळा दिवस म्हणतात. कश्मिर भारताने कसा जबरदस्तीने गिळंकृत केलाय असा प्रचारच जागतिक पातळीवर केला जातो.)

27 ऑक्टो । हाचि तो दिवस ।

कश्मिरी अवस । संपविली ॥

श्रीनगरवर । मिळविला ताबा ।

पाक म्हणे तौबा । पळतांना ॥

पाकसाठी हाच । दिवस तो काळा ।

आतंकिंची शाळा । भरलेली ॥

भारतविरोधी । प्रचार हा नीट ।

चाले टुलकीट । जागतिक ॥

क्रिकेट हा आता । राहिला न खेळ ।

देशद्रोही मेळ । दिसू लागे ॥

व्यापलेला भाग । लागला निसटू ।

समूळ उपटू । विषवल्ली ॥

पीओके घेवून । देऊ या उत्तर ।

पसरो अत्तर । कांत म्हणे ॥

(27 ऑक्टोबर 2021)

उसंतवाणी-216

(सीएए आंदोलनात भडकावू भाषण केले म्हणून शर्जिल इमाम तुरूंगात आहे. त्याची जमानत याचिका फेटाळण्यात आली. त्यावर मानवाधिकाराचे नाव घेवून पुरोगाम्यांनी आरडा ओरड सुरू केली आहे.)

शर्जिल इमाम । मिळाली ना बेल ।

भोग आता जेल । कर्मफळे ॥

‘भारताला तोडू’ । देशद्रोही बोल ।

जिभेचा हा तोल । सुटलेला ॥

केवळ ना जीभ । दूषित हा मेंदू ।

सेक्युलर भोंदू । लाडावती ॥

कायद्याने नीट । आवळला फासा ।

तडफडे मासा । देशद्रोही ॥

‘डर का माहौल’ । केला बोलबाला ।

अल्पसंख्याकाला । भुलविले ॥

देशद्रोही त्याला । नाही दया माया ।

हवे बडवाया । कायद्याने ॥

युएपीए चा हा । बसता फटका ।

फुटला मटका । कांत म्हणे ॥

(28 ऑक्टोबर 2021)

श्रीकांत उमरीकर, जनशक्ती वाचक चळवळ, औरंगाबाद 9422878575