उसंतवाणी - राजकीय उपहास- भाग ४६

उरूस, 11 ऑगस्ट  2021 

उसंतवाणी- 136

 (नीरज चोप्राला सुवर्णपदक मिळताच एका वेगळ्याच टीकेला तोंड द्यावे लागत आहे. पूर्वी त्याने मोदींच्या अभिनंदानाचे कसे ट्विट केले होते, ऑस्टे्रलियातील भारतीयाची ज्याने खालिस्तान्याची धुलाई केली त्याचे अभिनंदन कसे केले परिणामी तो कसा भगवा दहशतवादी आहे, संघी आहे अशी गलिच्छ टिका पुरोगामी करत आहेत. त्याची जात काढली जात आहे. )

सोन्याचा दिवस । ज्यामुळे देशात ।

काढतात जात । त्याची इथे ॥

निरज शब्दाचा । अर्थ हो कमळ ।

सुरू मळमळ । त्यावरून ॥

संघी म्हणोनिया । मारू त्याला शिक्का ।

पुर्वग्रह पक्का । करूनिया ॥

मंगल प्रसंगी । लागतात भांडू ।

ऐसे हे लिब्रांडू । नतद्रष्ट ॥

संशय शिंतोडे । नीरज सोसतो ।

ट्विटर ठासतो । कधीतरी ॥

थुंकण्याचा आहे । पुरोगामी धर्म ।

विकृतीचे वर्म । ओळखावे ॥

कांत देशद्रोही । असली जमात ।

आली नशिबात । भारताच्या ॥

(9 ऑगस्ट 2021)

उसंतवाणी- 137

(अल्पवयीन बलात्कारितेच्या घरी राहूल गांधींनी भेट दिली. त्या कुटूंबाचा फोटो त्यांनी आपल्या ट्विटरवर प्रसिद्ध केला. हा कायद्याने गुन्हा आहे. पण हे तारतम्य त्यांना नाही. ट्विटरने तो फोटो डिलीट करताच रणदीप सुरजेवाला, पवन खेडा सारख्य त्यांच्या चमच्यांनी तो रिट्विट केला. त्यावरून मोठा गदारोळ उठला आहे. )

ट्विटरवरती । असभ्य दर्शन ।

हीन प्रदर्शन । राहूलचे ॥

पिडीतेच्या घरी । सांत्वनाची भेट ।

छायाचित्र थेट । प्रसिद्धीला ॥

कायदा सांगतो । नको फोटो नाव ।

घालु नका घाव । दु:खावरी ॥

कायदा तो सोडा । नाही नैतिकता ।

नाही बुद्धिमत्ता । तारतम्य ॥

तैसे नितीभ्रष्ट । त्यांचे झीलकरी ।

रीट्विट करी । तोची फोटो ॥

ट्विटर स्वत:च । करे ते डिलीट ।

परी न हो नीट । वृत्ती यांची ॥

कांत गेली खुर्ची । पुरेसा न धडा ।

अस्तित्वाला गाडा । राजकीय ॥

(10 ऑगस्टे 2021)

उसंतवाणी- 138

(ओबीसी आरक्षणाचा चेंडू कायदा करून केंद्राने राज्याकडे ढकलला. हे आरक्षण 50 टक्क्याच्या मर्यादेत बसविण्याचे आवाहन आता सर्वच राज्य सरकारांकडे आहे.)

कायद्याने उडे । आरक्षण चेंडू ।

केंद्र-राज्य भांडू । लागलेत ॥

पन्नास टक्क्यांचे । घातले बंधन ।

त्याचे उल्लंघन । शक्य नाही ॥

पन्नास मध्येच । बसवता कोटा ।

असंतोष मोठा । उठणार ॥

धरता चावते । सोडता पळते ।

सर्वांना छळते । आरक्षण ॥

धट्टाकट्टा त्याला । बनवते पंगु ।

कपड्यात नंगू । दाखवते ॥

मागासपणाची । अभिमाने स्पर्धा ।

त्याच्यासाठी गर्दा । सामाजिक ॥

कांत मागासांना । जोडता ‘इतर’ ।

तितर बितर । खेळ सारा ॥

(11 ऑगस्ट 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग ४५

उरूस, 8 ऑगस्ट  2021 

उसंतवाणी- 133

 (मान्सुन सर्वत्र चांगला कोसळत आहे. देशाच्या बहुतांश भागात खरीपाची पेरणी पूर्ण झाली आहे. पीकं चांगली वाढत आहेत. ऑलिंपिक मधून खुषखबर आलेली आहे. हॉकीत भारताला कास्य पदक प्राप्त झाले आहे. 41 वर्षांनी भारताला हॉकित पदक मिळाले आहे. महिलांचा संघही शेवटपर्यंत जावून धडकला होता.)

पहिल्या सारखा । पाउस पडतो ।

जरा ना रडतो । कोरोनात ॥

पहिल्या सारखे । वाहतसे पाणी ।

ओठांवर गाणी । खेळवीत ॥

पहिल्या सारखे । कडेवर मुल ।

वेलीवर फुल । हसतसे ॥

पहिल्या सारखी । शेती नांगरणी ।

स्वप्नांची पेरणी । होत असे ॥

हॉकीला ये पुन्हा । सोन्याचे दिवस ।

नैराश्य अवस । टाळूनिया ॥

समाज ओढतो । जग्गनाथ रथ ।

आनंदाची नथ । घालुनिया ॥

कांत माणसाची । मोठी जिद्दी जात ।

आपत्तीला मात । देत असे ॥

(6 ऑगस्ट 2021)

उसंतवाणी- 134

(क्रिडा क्षेत्रातील योगदानासाठी देण्यात येणारा सर्वौच्च खेलरत्न पुरस्कार राजीव गांधींच्या नावाने दिला जात होता. त्याचे नाव बदलून मेजर ध्यानचंद खेलरत्न पुरस्कार असे करण्याची घोषणा पंतप्रधान नरेंद्र मोदी यांनी केली. त्यावर अपेक्षेप्रमाणे गदारोळ उठला. कॉंग्रेस आणि इतर पुरोगामी चाटुकार यांनी ओरड करायला सुरवात केली. )

ध्यानचंद नावे । मोठी आली आंधी ।

त्यात बुडे गांधी । राजीव हा ॥

परिवार नामे । जिथे तिथे यत्न ।

त्यात खेलरत्न । सापडले ॥

कुटूंब नावाचा । झाला पोरखेळ ।

म्हणून ही वेळ । आली असे ॥

आधी जवाहर । इंदिरा राजीव ।

संजय सजीव । गल्लो गल्ली ॥

मोदींनी मारली । पेनॉल्टीची किक ।

झटका हा क्विक । बसतसे ॥

नाम बदलाने । ओरडती श्वान ।

बुद्धिने गहाण । स्वार्थापोटी ॥

हवा तो सोडला । नको तो जपला ।

गांधी वापरला । कांत म्हणे ॥

(7 ऑगस्टे 2021)

उसंतवाणी- 135

(नीरज चोपरा याला टोकियो ऑलिंपिकमध्ये भालाफेकीत सुवर्ण पदक प्राप्त झाले. सर्वच भारतीयांसाठी हा सोन्याचा दिवस होता.  )

सोन्याचा दिवस । उगवला आज ।

पदकाचा साज । शोभतसे ॥

निरजे फेकला । भाला हा खच्चून ।

आणले टिच्चुन । सुवर्णच ॥

क्रीडा उदासीला । अचुक भेदले ।

प्रेमे आनंदले । देशवासी ॥

चालीतच होता । विजेत्याचा डौल।

हमी जिंकण्याची । मिळे मग ॥

बावनकशी ही । तुझी मेहनत ।

विजय हसत । कवळितो ॥

तुझ्या कौतुकाचे । वाजती चौघडे ।

रांगोळ्या नी सडे । गंधमयी ॥

कांत लखलख । सोनेरी हा क्षण ।

करू औक्षवण । डोळ्यांनीच ॥

(8 ऑगस्ट 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- ४४

उरूस, 5 ऑगस्ट  2021 

उसंतवाणी- 130

 (एकीकडे ऑलिंपिक मध्ये भारताला पदके मिळत आहेत. आपले खेळाडू अतिशय उत्तम कामगिरी करत आहेत. आणि दुसरीकडे संसदेत गोंधळ चालू आहे. खेळाच्य मैदानावर खुल्यात सुसंस्कृतपणाचे दर्शन होत आहे. संसदेच्या बंदिस्त सभागृहात असभ्यपणा दिसतो आहे.  )

मानकरी कोणी । कास्यपदकाचे ।

हास्यपदकाचे । कुणी इथे ॥

नेत्रदिपक ही । तिथे कामगिरी ।

इथे मारामारी । संसदेत ॥

खिलाडू वृत्तीचे । मैदानी दर्शन ।

इथे प्रदर्शन । मग्रुरीचे ॥

तिथे नियमांत । चाले खेळ-क्रिडा ।

इथे चाले राडा । राजकीय ॥

युद्धाची रानटी । सोडूनी प्रवृत्ती ।

रूजली संस्कृती । खेळाची ही ॥

सोडूनिया मार्ग । संवादाचा सभ्य ।

संसद असभ्य । का बनली? ॥

कांत मैदानात । शांत सभ्य खेळ ।

संसदी गोंधळ । लज्जास्पद ॥

(3 ऑगस्ट 2021)

उसंतवाणी- 131

(राहूल गांधी यांनी विरोधकांना नाष्ट्यासाठी बोलावले. नंतर सर्व सायकल मोर्चा घेवून संसदेकडे गेले. आधी ट्रॅक्टर मार्च, नंतर नाष्टा आणि सायकल मोर्चा असले बालीश चाळे करण्यातच विरोधक वेळ घालवत आहेत.)

चला चला सारे । आधी करू नाष्टा ।

मग धरू रस्ता । संसदेचा ॥

ट्रॅक्टर नंतर । सायकल मोर्चा ।

होवू दे रे चर्चा । खालीपिली ॥

जोशामध्ये घेवू । प्रेस कॉन्फरन्स ।

आत ऍपिरन्स । मात्र नको ॥

‘अरविंद’ ‘माया’ । ‘नविन’ ‘जगन’।

स्व:तात मगन । येईचिना ॥

शाळेच्या बाहेर । उंडारते पोर ।

म्हणते मास्तर । शिकवेना ॥

वर्गात येताच । घालते धिंगाणा ।

शोधते बहाणा । पळण्याचा ॥

संसद सभ्यता । ज्याला नाही जाण ।

सावडा ही घाण । कांत म्हणे ॥

(4 ऑगस्टे 2021)

उसंतवाणी- 132

(पंजाबच्या करोडपती आमदारांच्या खिशात आयकर भरण्यासाठी पैसे नाहीत. त्यांचा आयकर पंजाब सरकार भरते. ही बातमी टाईम्स नाउने उजेडात आणली आणि अजून काही राज्यांत आमदार मंत्री यांचा आयकर सरकार भरत असल्याचे समोर आले. )

गरीब बिचारे । मंत्री आमदार ।

कसा भरणार । आयकर ॥

जनतेची सेवा । करूनी थकती ।

किती खर्च होती । पैसे त्यात ॥

पोसावा लागतो । इथे कार्यकर्ता ।

मग कर्ता धर्ता । बनतो तो ॥

सगळीच सोय । ‘खाण्याची’ ‘पिण्याची’।

हमी जिंकण्याची । मिळे मग ॥

नेत्यांच्या कल्याणा । जन्तेची विभुती ।

कर भरताती । म्हणुनीच ॥

मंत्री आमदार । आणि खासदार ।

यांचा सरकार । कर भरे ॥

कांत जनतेच्या । खिशावर डल्ला ।

मारण्याचा सल्ला । कोण देतो? ॥

(5 ऑगस्ट 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी- राजकीय उपहास- भाग ४३

 

उरूस, 2 ऑगस्ट  2021 

उसंतवाणी- 127

 (संसदेचे पावसाळी अधिवेशन चालू आहे. विरोधकांनी संसदेत गोंधळ घालून कामकाज बंद पाडले आहे. )

उदे लोकशाही । वाजते संबळ ।

चालला गोंधळ । दरबारी ॥

प्रतिष्ठापना ही । केली तुझी आई ।

नाव लोकशाही । म्हणोनिया ॥

निवडले भोपे । तुजा पुजणार ।

नावे खासदार । ओळखती ॥

नाचू लागले हे । होवोनिया भुत्ये ।

सर्व स्वार्थ शिते । चिवडिती ॥

जनहिताची ना । बांधतात पुजा ।

राजकिय इजा । फक्त चाले ॥

आई तुच दिला । वर भरपुर ।

‘खासदारा’सूर । माजलेले ॥

कांत म्हणे आई । नको बसू शांत ।

गोंधळाचा अंत । कर आता ॥

(31 जूलै 2021)

उसंतवाणी- 128

(चिनी कम्युनिस्ट पक्षाला 100 वर्षे पूर्ण झाली म्हणून एक ऑन लाईन कार्यक्रम झाला. त्यात भारतातील सिताराम येच्युरी आणि डी.राजा यांनी सहभाग घेत चिनी कम्युनिस्ट पक्षाच्या नेत्यांचे अभिनंदन केले. त्यावरून वाद निर्माण झाला. )

चीनमध्ये वाजे । शताब्दीचा बाजा ।

येच्युरी डी.राजा । खुश येथे ॥

देशावर केला । होता ज्यांनी हल्ला ।

त्यांचा गोड सल्ला । यांच्यासाठी ॥

आपुल्या देशाची । खावुनिया पोळी ।

वाजविती टाळी । चायनाची ॥

चीनमध्ये जरा । पडता पाऊस ।

छत्रीची ही हौस । भारतात ॥

फॅसिस्ट म्हणूनी । इथे काढी खोट ।

चायनात ओठ । शिवलेले ॥

जगातले म्हणे । कामगार एक ।

ग्राहक का एक । नको जगी? ॥

कांत कम्युनिस्ट । सर्वार्थाने ‘डावे’ ।

त्यांच्यात ‘उजवे’ । कांही नाही ॥

(1 ऑगस्टे 2021)

उसंतवाणी- 129

(मुंबईच्या एका कार्यक्रमात उद्धव ठाकरे यांनी अशी थप्पड मारू की परत उठणार नाही अशी मुख्यमंत्री पदाला न शोभणारी भाषा केली. भाजप आमदार प्रसाद लाड यांच्या एका वक्तव्यावर ते प्रतिक्रिया देत होते. )

कोण बोले आम्हा । हसूनी खप्पड ।

मारू का थप्पड । एक अशी ॥

काकांना पुसून । बोलतो मी ठाम ।

काढतो हा घाम । भाजपचा ॥

दोन कुबड्यांची । खुर्ची माझी स्थिर ।

मला मीच धरी । रोज देतो ॥

सोनियाचे द्वारी । तलवार म्यान ।

हाची स्वाभिमान । जाणा खरा ॥

वसुलीची घेतो । मोजून रक्कम ।

सर्कार भक्कम । बिघाडीचे ॥

तिघे मिळूनिया । दावितो स्वबळ ।

कोण मळमळ । म्हणतसे ॥

कांत वाचाळांची । काय सांगू ‘थोरी’ ।

मरणाचे दारी । जनता ही ॥

(2 ऑगस्ट 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग ४२

 

उरूस, 30 जूलै  2021 

उसंतवाणी- 124

 (दिल्लीच्या सीमेवरचे किसान आंदोलन पूर्णपणे पेचात सापडले आहे. राकेश टिकैत सारख्या नेत्यांच्या आडमुठपणाने या आंदोलनाचे नुकसान केले. 11 चर्चेनंतर जर हे आंदोलन मागे घेतले असते तर त्याचा फायदा झाला असता. पण कुठलाच वैचारिक पाया नसल्याने हे आंदोलन नि:संदर्भ झाले आहे. )

कृषी आंदोलन । अडके पेचात ।

आरंभ टेचात । झाला ज्याचा ॥

आठ महिन्यांत । घेरूनिया दिल्ली ।

कृषी हित किल्ली । सापडेना ॥

निवडणुकीचा । उत्तरेत रंग ।

स्वप्न करू भंग । भाजपाचे ॥

योगींचे वाजवू । म्हणे तीन तेरा ।

लखनौत डेरा । टाकू आता ॥

पंधरा ऑगस्ट । फडकू तिरंगा ।

या नावाने दंगा । करू ऐसा ॥

शेती शेतकरी । बाजूला ठेवला ।

सत्तेचा चढला । रंग सारा ॥

कांत बुद्धीची ना । पडे भेटगाठ ।

सोला दूने आठ । ऐसे जाट ॥

(28 जूलै 2021)

उसंतवाणी- 125

(कोल्हापुर सांगली भागात पुर परिस्थितीची पाहणी करताना नदीला भिंत बांधू असे अजब वक्तव्य मुख्यमंत्री उद्धव ठाकरे यांनी केले.  )

नदीच्या किनारी । बांधू मोठी भिंत ।

बोले बुद्धीवंत । मुख्यमंत्री ॥

त्याहीपेक्षा सोपे । फोटो काढा बाका ।

पीसीवर टाका । अलगद ॥

हवा तो पोर्शन । करावा सिलेक्ट ।

टाका डायरेक्ट । हवा तिथे ॥

करा हिर्वागार । माणदेशी पट्टा ।

औद्योगीक थट्टा । विदर्भाची ॥

ड्रायरने करा । मुंबई कोरडी ।

कोकणी तिरडी । बांधलेली ॥

मराठवाड्यात । समुद्र ढकला ।

खान्देश तापला । लोणी लावा ॥

कांत फेसबुक । करावे लाईव्ह ।

कशाला ड्राईव्ह । दूर दूर ॥

(29 जूलै 2021)

उसंतवाणी- 126

(प्रशांत किशोर यांनी सर्व राजकीय वातावरण अशांत केले आहे. आधी तिसरी आघाडी आणि आता प्रत्यक्ष कॉंग्रेसशीच चर्चा. कॉंग्रस प्रवेशाची तयारी असं सगळं चालू आहे. )

गठबंधनाची । सुरू झाली चर्चा ।

उघडला मोर्चा । विरोधाचा ॥

नेहमीचा आहे । राजकीय खेळ ।

कुणाचा न मेळ । कुणाशीच ॥

पी.एम.पदाची । ही संगीत खुर्ची ।

माझ्याच घरची । म्हणताती ॥

पत्रकार देती । लावुनिया काडी ।

काडीवर माडी । नेता बांधी ॥

वारंवार ऐसा । उडतो पतंग ।

राजकीय रंग । उधळतो ॥

राजकीय हवा । बनवी अशांत ।

किशोर प्रशांत । स्ट्रॅटजीस्ट ॥

कांत खेळ पाही । मतदार राजा ।

वाजवितो बाजा । नको त्याचा ॥

(30 जूलै 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- ३९

उरूस, 21 जूलै  2021 

उसंतवाणी- 115

 (कावड यात्रेबाबत सर्वौच्च न्यायालयाने सुमोटो दाखल करून घेत त्यावर निर्बंध घालण्याचा आग्रह उत्तर प्रदेश सरकारला धरला. तसे निर्बंध घातले गेले. पण नेमकं याच वेळी 20-21 जूलैला बकरी ईद साजरी होणार आहे. त्याला मात्र केरळ सरकारने खुली सुट दिली. त्यावर सर्वौच्च न्यायालयाने चकार शब्द काढला नाही. सगळे पुरोगामी कुंभमेळा, कावड यात्रा यावर टिकेची झोड उठवतात पण बकरी ईद आणि किसान आंदोलन यावर मात्र काहीच बोलत नाहीत. हा दुट्टप्पीपणा आहे. )

बकरी ईदला । केरळात संधी ।

कावडीला बंदी । उत्तरेत ॥

कोरोना आमचा । किती सेक्युलर ।

फक्त हिंदूवर । जोर त्याचा ॥

इस्लामला लाभे । कवच कुंडले ।

विचार बंडले । पुरोगामी ॥

कावड यात्रेचा । कोर्टात सुमोटो ।

बकरीचा फोटो । दिमाखात ॥

भला हा कायदा । सतीला दे बत्ती ।

शिंदळीला हत्ती । हेच खरे ॥

कृषी आंदोलन । पुरोगामी पक्के ।

त्याला नाही धक्के । कोव्हिडचे ॥

कांत ओळखा हे । बुद्धीजीवी चाळे ।

बुद्धीचे दिवाळे । निघालेले ॥

(19 जूलै 2021)

उसंतवाणी- 116

(आषाढी एकादशीचा हा दिवस. कोरोना आपत्तीत जग होरपळून निघाले आहे. त्यातून मार्ग निघू दे या शिवाय विठ्ठलापाशी काय मागणार? )

युगे अठ्ठावीस । विठेवरी उभा ।

पाहतोस शोभा । कोरोनाची ॥

तुच निर्मिलेली । माणसेही जिद्दी ।

संकटाच्या हद्दी । ओलांडती ॥

नसे हाती काही । श्रद्धा हेची बळ ।

काढतात कळ । दुष्काळात ॥

शतके लोटली । कांही नसे थाट ।

दिंडी चाले वाट । साधेपणी ॥

प्रेमे जोडलेले । दोन हे हस्तक ।

झुकले मस्तक । प्रमाणीक ॥

जाणतोस देवा । संकटाची धग ।

पुर्वपदी जग । येवू दे रे ॥

कांत आषाढीचे । हेची संकिर्तन ।

विशुद्ध वर्तन । राहो देवा ॥

(20 जूलै 2021)

उसंतवाणी- 117

(कायद्या समोर सगळे समान आहेत असा आपला गैरसमज आहे. प्रत्यक्षात कांही जणांसाठी कायदाच वेगळा असतो. अनिल देशमुख माजी मंत्री यांच्यासाठी कायदा वेगळा आहे. अजूनही त्यांना ई.डी. समोर चौकशीला यायला जमले नाही. आणि त्यावर कांही कडक कारवाई पण शासनाला करता आलेली नाही. )

कायद्या पुढती । सारेच समान ।

परी असमान । कायदाच ॥

इतर कुणाला । ईडीचे समन्स ।

जीव कासावीस । होई त्याचा ॥

व्हावेच लागते । समोर हजर ।

पण जर तर । कांही नाही ॥

माजी मंत्री मात्र । फिरती मोकळे ।

कोर्टामध्ये गळे । काढताती ॥

कायद्याचे हात । सामान्यांना लंबे ।

यांच्यासाठी ‘खंबे’ । असतील ॥

न्यायदेवतेच्या । डोळ्यांवर पट्टी ।

ओठांवर शिट्टी । यांच्यासाठी ॥

कांत समतेचे । हेची अधिष्ठान ।

‘जास्तीचे’ समान । कांही जण ॥

(21 जूलै 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- ४१

उरूस, 27 जूलै  2021 

उसंतवाणी- 121

 (ओल्या दुष्काळाचे संकट कोकणावर कोसळले आहे. त्याकडे लक्ष द्यायला मुख्यमंत्र्यांना वेळ नाही. शिवसेनेचा बालेकिल्ला पण तिकडे शिवसेनेचाच मुख्यमंत्री दुर्लक्ष करतो. )

ओल्या दुष्काळात । अवघे कोकण ।

सारे चिपळुण । पाण्याखाली ॥

अर्थ राजधानी । लाडकी मुंबई ।

जाहली तुंबई । पर्जन्याने ॥

डोंगर कोसळे । जाहले कफन ।

जिवंत दफन । माणसे ही ॥

पाण्याविना कधी । डोळ्यामध्ये पाणी ।

पाण्यामुळे पाणी । आज डोळा ॥

बुडता पाण्यात । सेना बालेकिल्ला ।

पुजेचा हा सल्ला । कोण देई ॥

चक्रीवादळाने । होते थोबडले ।

नाही उघडले । डोळे तरी ॥

कांत सत्तेवर । कोकण सुपुत्र ।

सिद्ध हा कुपुत्र । भुमीसाठी ॥

(25 जूलै 2021)

उसंतवाणी- 122

(उत्तर प्रदेशांत बहुजन समाज पक्षाने ब्राह्मण संमेलन घेतले. आता समाजवादी पक्ष अस संमेलन घेत आहे. ज्यांना आधी शिव्या घातल्या त्यांच्यासाठी ओव्या का गायल्या जात आहेत? )

सत्तेसाठी सुरू । यु.पी.त देखावा ।

ब्राह्मण मेळावा । भरलेला ॥

कला ज्याला दिल्या । मनसोक्त शिव्या ।

आज त्याला ओव्या । कशासाठी ॥

तिलक तराजू । और तलवार ।

जूते मारू चार । पूर्वी म्हणे ॥

हत्ती नका म्हणू । आहे हा गणेश ।

ब्रह्मा नी महेश । विष्णुसवे ॥

पुरोगामी सारे । का बावचळले ।

बुद्धीने ढळले । सत्तेपायी ॥

शर्टावर जरी । घातले जानवे ।

मेंदूत जाणवे । पोकळीच ॥

कांत ओळखावा । बुद्धीने ब्राह्मण ।

जन्माचे कारण । चुक आहे ॥

(26 जूलै 2021)

उसंतवाणी- 123

(राहूल गांधी यांनी ट्रॅक्टर चालवत आज संसदेत प्रवेश केला. वस्तुत: त्या वाहनाला बंदी असून कलम 144 लागू केल्याने जमावाला पण बंदी आहे. पण कांहीतरी पोरकटपणा करून राहूल गांधी स्वत:चे आणि पक्षाचे हसू करून घेतात. )

राहूल नेता की । कॉमेडी ऍक्टर ।

चालवी ट्रॅक्टर । दिल्लीमध्ये ॥

निघे अचानक । येताच लहर ।

विचित्र कहर । राजकीय ॥

‘कानुन वापसी’ । इतका फॅक्टर ।

त्यापायी ट्रॅक्टर । दौडविले ॥

कायदा त्रुटीचा । एकही ना मुद्दा ।

म्हणून हा भद्दा । खेळ केला ॥

स्व-जाहिरनामा । वाचला ना कधी ।

हेच मुद्दे आधी । त्यात होते ॥

कॉंग्रेस मुक्तीचा । केवढा उरक ।

स्टार प्रचारक । भाजपचा ॥

कांत नेतृत्वाचा । सारा पोरखेळ ।

धोरणात मेळ । कुठे नाही ॥

(27 जूलै 2021)

श्रीकांत उमरीकर, जनशक्ती वाचक चळवळ, औरंगाबाद 9422878575