उसंतवाणी - राजकीय उपहास- भाग २२

 

उरूस, 31 मे 2021 

उसंतवाणी- 64

(26 जानेवारी 2021 ला लाल किल्ल्यावर जो दंगा झाला त्यातील 18 आरोपींवर दिल्लीतील तिस हजारी कोर्टात चार्जशीट पोलिसांनी दाखल केली आहे. या गुन्हेगारांचे समर्थन करणारे अकाली दल आणि किसान युनियन चे नेते कार्यकर्ते देशद्रोह्यांचा बचाव करता करता अडचणीत सापडले आहेत. )

ज्यांनी केले होते । लाल किल्ला दंगे ।

त्यांना केले नंगे । कायद्याने ॥

कोर्टात दाखल । झाली चार्जशीट ।

कटाची ती नीट । कुंडलीच ॥

तिरंग्याचा केला । ज्यांनी अपमान ।

आवळा ती मान । कायद्याने ॥

म्हणूनी किसान । त्यांना पुन्हा पुन्हा ।

झाकताती गुन्हा । देशद्रोही ॥

पोलिसांच्यावर । करोनिया हल्ला ।

कृषीहित कल्ला । खोटा खोटा ॥

ट्रॅक्टर आमुचा । आहे म्हणे टँक ।

मांडिला आतंक । दिल्लीमध्ये ॥

‘कांत’ मिळाला हा । भक्कम पुरावा ।

मातीत पुरावा । देशद्रोह ॥

(29 मे 2021)

उसंतवाणी- 65

(पंतप्रधान मोदींनी चक्रिवादळाच्या नुकसानी संदर्भात एक बैठक पश्चिम बंगालात बोलावली होती. खुद्द मुख्यमंत्री ममता बॅनर्जी या त्याला 30 मिनीटे उशीरा आल्या आणि 15 मिनिटांत काही एक कागदपत्रे सादर करून निघूनही गेल्या. त्यांच्या सोबत राज्याचे मुख्य सचिव अलपन बंधोपाध्याय हे पण उशीरा आले. राज्यशिष्टाचाराचा भंग उघड उघड केल्या गेला.  )

ममतांचा चाला । राजकिय दंगा ।

प्रोटोकॉल ठेंगा । दाविती हा ॥

पंतप्रधानांची । असू दे मिटिंग ।

माझी ही सेटींग । वेगळीच ॥

माझ्यासाठी माझे । राज्य हाची देश ।

पुसून प्रवेश । करा इथे ॥

बोलभांड ऐसे । नेमले प्रवक्ते ।

गाती माझी सुक्ते । भक्तिभावे ॥

मीच संपविले । कॉंग्रेस नी डावे ।

फुर्फुराचे दावे । शुन्य केले ॥

भाजपा रोकले । शंभराच्या आत ।

सुरू ऊतमात । ‘कांत’ म्हणे ॥

लोकशाहीमध्ये । माजती जे दैत्य ।

वैध बंदोबस्त । त्यांचा करू ॥

(30 मे 2021)

उसंतवाणी- 66

(महाराष्ट्रातील लॉकडाऊन उठविण्यासंदर्भात एक फेसबुक लाईव्ह मुख्यमंत्री उद्धव ठाकरे यांनी केले. त्यांच्या भाषणांत काहीच अर्थपूर्णता नव्हती. शिवाय निर्णय तर कुठलाच घेतला नाही. ‘माहित्या’, ‘आपत्या’ असे शब्द वापरून आपले भाषेबाबतचे गाढ अज्ञानच त्यांनी उघड केले. )

फेसबुकवरी । चालते लाईव्ह ।

दिशा ना ड्राईव्ह । नाही दिसे ॥

बोलताना वाटे । केवळ पुतळा ।

धन्य शब्दकळा । गोल गोल ॥

घरात बसून । हाकतो शकट ।

असू दे बिकट । परिस्थिती ॥

कोकणचा केला । वेगे वेगे दौरा ।

जागेवर भौरा । फिरे जैसा ॥

पंधरा दिसांनी । वाढले निर्बंध ।

गोत्यात सबंध । व्यवसाय ॥

का बरे लाईव्ह । केला अट्टाहास ।

काहीच ना खास । सांगितले ॥

कांत बोलताना । अडकते गाडी ।

जनतेची नाडी । गवसेना ॥

(31 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २१

उरूस, 28 मे 2021 

उसंतवाणी- 61

(कॉंग्रेस नेते सलमान खुर्शीद यांनी राजीव गांधी यांच्या पुण्यतिथीला एक ट्विट केले. त्यात राहूल गांधी आणि राजीव गांधी यांचे फोटो आहेत आणि असं लिहिलं आहे की ‘किंग ऑफ डेमोक्रसी’. ही जी गुलामीची मानसिकता आहे त्यावर मग बरीच टीका झाली. )

सल्मान खुर्शीद । करितसे ट्विट ।

गाली लावा तिट । राहूलच्या ॥

राजीव नंतर । राहूलच राजा ।

वाजवा रे बाजा । अंगणात ॥

कॉंग्रेसी भाट हे । बोलती जोशात ।

राजस वेशात । लोकशाही ॥

वारसाचा हक्क । आहे गादीवर ।

बाकीचे चाकर । भोवताली ॥

राहूल हा ‘किंग’ । त्यालाच मुजरे ।

राज्यात हुजरे । जागजागी ॥

पटेलांनी केली । संस्थाने खालसा ।

तरिही वारसा । सांगती हे ॥

‘कांत’ शरिरात । गुलामीचे रक्त ।

लोकशाही फक्त । देखावाच ॥

(26 मे 2021)

उसंतवाणी- 62

(समाज माध्यमं यांना भारतीय कायद्याने काही नियम पाळण्यास सांगितले होते. त्याची तीन महिन्याची मुदत 25 मे रोजी संपली. पण यांनी कुणीच त्यावर काही भारत सरकारला कळवले नाही. संबित पात्रा यांच्या ट्विटरवर मॅनिप्युलेटेड असा शिक्का मारण्यात आला आणि या वादाने उचल खाल्ली. त्यातच सरकारने दिलेली मुदत संपली. ट्विटरचा डावा अजेंडाही उघड झाला.  )

चाले चुरू चुरू । ट्विटर ट्विटर ।

बसले खेटर । कायद्याचे ॥

बोलभांड इथे । दोन कोटी जीव ।

करी चिव चिव । सदोदीत ॥

ट्विटर म्हणजे । वैश्विक चव्हाटा ।

लिब्रांडू बोभाटा । सदा इथे ॥

केवळ माध्यम । वाहती कंटेन्ट ।

जाणे ना इंटेन्ट । आव ऐसा ॥

मॅन्युप्युलटेड । ऐसा मारी शिक्का ।

इरादा हा पक्का । राजकीय ॥

अभिव्यक्ती नावे । देशद्रोही काम ।

ऐसे हे हराम । जाणावे जी ॥

‘कांत’ म्हणे खास । लोकांची दुनिया ।

सोशल मिडिया । नाव जरी ॥

(27 मे 2021)

उसंतवाणी- 63

(26 मे ला वैशाखी पौर्णिमा म्हणजेच बुद्ध पौर्णिमा होती. बुद्धाची जयंती साजरी करताना त्या विचाराकडे आपण कधी लक्ष देतो? इतक्या अप्रतिम बुद्ध मुर्ती प्राचीन लेण्यांमधुन आढळून येतात. आधुनिक काळात अशा किती मुर्ती आपण निर्माण करू शकलो? एका जातीत बुद्धाला अडकवून पूर्वाश्रमीचे महार आणि इतरही सर्व मोकळे झाले.  )

बाबासाहेबांचा । बुद्ध हवा कोणा ।

केवळ धिंगाणा । जयंतीला ॥

देव जो नाकारे । त्याचा केला देव ।

चाले देवघेव । पुर्वीचीच ॥

बुद्धीप्रामाण्याची । वाहे धम्मधारा ।

तिला नाही थारा । इथे कुठे ॥

लेण्यातील शिल्प । देखण्या त्या मुर्ती ।

नाही जरा स्फुर्ती । घेत कुणी ॥

गल्लोगल्ली उभे । बेढब पुतळे ।

फुटलेले डोळे । सौंदर्याचे ॥

अथांग निळाई । आहे कल्पांतीत ।

कोंडली जातीत । इवलाश्या ॥

‘कांत’ आज दोघे । भीमराव बुद्ध ।

किती हातबुद्ध । जाणवती ॥

(28 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २०

उरूस, 26 मे 2021 

उसंतवाणी- 58

(गडचिरोलीच्या ऐटापल्ली गावात जंगलात 13 दहशतवाद्यांचा खात्मा करण्यात आला. कांही दिवसांपूर्वीच अर्बन नक्षलींच्या याचिका फेटाळून त्यांना तुरूंगात डांबण्यात आले. या अर्बन नक्षलींचे कोडकौतुक करणारे आज मात्र काहीच बोलताना दिसत नाहीत. नुकतेच 22 जवान नक्षलींच्या हल्ल्यात शहिद झाले त्यावरही हे मानवाधिकारवाले काहीच बोलत नाहीत. )

नक्षलवाद्यांचा । होत असे खात्मा।

शांत होई आत्मा । सैनिकांचा ॥

शूर जवानांनी । बाराच्या भावात ।

तेरांना ढगात । पोचविले ॥

धोकादायक हे । भागात जंगली ।

अर्बन नक्षली । त्यांच्याहूनी ॥

पत्रकार आणि । कलाकार मुर्त ।

ऐसे सारे धूर्त । पुरोगामी ॥

नक्षली क्रांतीचे । बोल हे बोबडे ।

तुकडे तुकडे । ऐकू येती ॥

स्वतंत्र देशात । मागती आझादी ।

पूर्ण बरबादी । विचारांची ॥

‘कांत’ म्हणे सोपी । शस्त्रांची चढाई ।

मेंदूची लढाई । आव्हान हे ॥

(23 मे 2021)

उसंतवाणी- 59

(उद्धव ठाकरे यांनी कोकणचा चक्रिवादळ नुकसान पाहणीचा दौरा केवळ 5 तासांत आटोपला. जनतेच्या भावनाही त्यांनी जिल्ह्याधिकार्‍यांच्याच तोंडून समजून घेतल्या. आणि याच भागात विरोधी पक्षनेते देवेंद्र फडणवीस व प्रवीण दरेकर चार दिवस लोकांना भेटत नुकसानीची पाहणी करत फिरत होते तर त्याला यांनी फोटो सेशन करतात म्हणून टोमणा मारला. विरोधी पक्ष वैफल्यग्रस्त आहे म्हणून सांगितले. )

चक्रिवादळाच्या । वेगाहूनी भारी ।

सीऐमची फेरी । कोकणाची ॥

काय त्यांची गती । काय तो झपाटा ।

परतीचा टाटा । लागलीच ॥

सकाळचा नाष्टा । दुपारी जेवण ।

यामध्ये कोकण । उरकले ॥

लोकांचा आक्रोश । कलेक्टर ओठी ।

किती सिद्धी मोठी । उद्धवाची ॥

मोडून पडला । संसार रिकामा ।

आधी पंचनामा । महत्त्वाचा ॥

विरोधी नेत्यांचा । म्हणे फोटो दौरा ।

सीऐमचा तोरा । सरकारी ॥

‘कांत’ आधी नोंद । येत्या वादळाची ।

मग मदतीची । आस धरा ॥

(24 मे 2021)

उसंतवाणी- 60

(कृषी आंदोलन एका विचित्र अवस्थेत पोचले आहे. गर्दीमुळे कोरोनाचा प्रसार होतो आहे. पण अडमुठपणा करत आंदोलन जिद्दीवर अडून बसले आहेत. 26 मे ला आंदोलनाला 6 महिने पूर्ण होत आहेत. त्या निमित्ताने त्यांनी मोठा मोर्चा धरणे कार्यक्रम करण्याचे घोषित केले आहे. )

कृषी आंदोलक । कोरोना लाटेत ।

बैसले वाटेत । आडमुठे ॥

भाव मिळताच । गेले शेतकरी ।

दलाल व्यापारी । उरलेले ॥

गव्हाची खरेदी । खात्यामध्ये पैसा ।

तडफडे कैसा । बिचोलिया ॥

कृषी कायद्यांत । काय शब्द उणा? ।

सांगता येईना । कुणालाच ॥

कुणीच पाळेना । कोरोना नियम ।

आमंत्रिती यम । दुष्टबुद्धी ॥

बागायती साठी । आंदोलन खेळ ।

जिरायती वेळ । संकटाची ॥

‘कांत’ ना कामाचे । वैचारिक मुद्दे ।

कायद्याचे गुद्दे । हाणा यांना ॥

(25 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575

उसंतवाणी - राजकीय उपहास- भाग १९

उरूस, 23 मे 2021 

 उसंतवाणी- 55

(सिंगापूरमध्ये आढळलेल्या नविन व्हायरसचा लहान मुलांना धोका आहे. याचा भारतावर परिणाम होवू शकतो म्हणून आंतरराष्ट्रीय विमानसेवा रद्द करण्यात यावी. कोरोनाच्या तिसर्‍या लाटेसाठी भारताने सज्ज असावे असे ट्विट अरविंद केजरीवाल यांनी केले. यातील खोटेपणा लगेच उघडा पडला. सिंगापूर सरकारने कडक शब्दांत केजरीवाल यांना सुनावले. परराष्ट्र मंत्री एस.जयशंकर यांना यावर भारताची भूमिका स्पष्ट करावी लागली. )

सिंगापूरी नवी । कोरोनाची चाल ।

केजरी(ब)वाल । करितसे ॥

तिसर्‍या लाटेचा । मुलांना हा धोका ।

विमानांना रोका । सांगतसे ॥

अपुरी माहिती । मारितसे बाता ।

परदेशी लाथा । बसताती ॥

वर्षापासूनिया । बंद हे विमान ।

केजरूला ज्ञान । नाही जरा ॥

तिसर्‍या लाटेचा । मोदीला दे सल्ला ।

दुसरीचा हल्ला । पेला आधी ॥

मदतीला देश । सिंगापूर खडा ।

त्यांवरी शिंतोडा । उडवे हा ॥

‘कांत’ केजरूचे । ट्विट खोडसाळ ।

बदनामी आळ । देशावरी ॥

(20 मे 2021)

उसंतवाणी- 56

(कॉंग्रेस प्रदेशाध्यक्ष नाना पटोले यांनी नितीन गडकरी यांना देशाचा पंतप्रधान करण्यात यावे अशी मागणी करून धमाल उडवून दिली आहे. हेच पटोले 2019 च्या लोकसभेला याच नितीन गडकरी यांच्या विरोधात निवडणुक लढवताना हरलो तर राजकारणांतून सन्यास घेईन असे बोलून बसले होते. )

गडकरी यांना । करावे पीऐम ।

मोदींचा हो गेम । नाना म्हणे ॥

नाना पटोलेंची । काय झाली स्थिती ।

गडकरी स्तुती । करिती हे ॥

बेताल बोलणे । बदलला मुड ।

काळ कैसा सूड । उगवतो ॥

लोकसभे वेळी । बोलले हे खास ।

हारता संन्यास । घेणार मी ॥

गडकरी करी । पटोलेंचा खुर्दा ।

मिडियात गर्दा । बहु झाला ॥

पटोले निस्तरा । समस्य घरची ।

पक्षाध्यक्ष खुर्ची । रिकामीच ॥

‘कांत’ नाना उडे । कॉंग्रेस आकाशी ।

लक्ष भाजपाशी । गुंतलेले ॥

(21 मे 2021)

उसंतवाणी- 57

(माजी पंतप्रधान राजीव गांधी यांच्या पुण्यतिथी निमित्त 21 मे 2021 कॉंग्रेस खासदार कुमार केतकर यांनी दै. लोकमत मध्ये एक लेख लेहिला. त्यात त्यांनी राजीव इंदिरा हत्या आंतर राष्ट्रीय कटाचा भाग आहेत असं परत एकदा सांगितलं. शिवाय यात तपास पूर्ण झाला नाही असाही आरोप केला. आता मुद्दा असा आहे की 1984 पासून 2021 पर्यंत एकूण 37 वर्षांपैकी 23 वर्षे कॉंग्रेसच सत्तेवर होती किंवा तिचा पाठिंबा होता सरकारला. किंवा कॉंग्रेसीच पंतप्रधान पदावर होते. मग का नाही तपास केला गेला? आता ज्या डिएमके सोबत युती केली आहे त्याच पक्षाचे मुख्यमंत्री एम.के. स्टॅलिन यांनी राजीव मारेकर्‍यांना मुक्त करण्याची मागणी केली आहे. मग हे कुमार केतकरांना दिसत नाही का? मग हा नेमका कोणता कट आहे?  )

आंतरराष्ट्रीय । कटाची पिपाणी ।

‘कुमार’ मुखानी । वाजू लागे ॥

इंदिरा-राजीव । हत्या मोठा कट ।

तपासात फट । ऐसी शंका ॥

24 वर्षे ही । 84 पासून ।

सत्तेत बसून । कोण आहे? ॥

कटाच्या नावाने । चिवडिती शिते ।

संशयाची भुते । नाचविती ॥

स्टॅलिन बोलला । मोकळे सोडा रे ।

राजीव हत्यारे । झडकरी ॥

स्टॅलिन सामील । आहे का कटात? ।

त्याच्यात गोटात । कॉंग्रेस ही ॥

‘कुमार’ बुद्धीचा । सुमार हा कट ।

व्यर्थ खटपट । कांत म्हणे ॥

(22 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575

उसंतवाणी - राजकीय उपहास- भाग १८

उरूस, 19 मे 2021 

उसंतवाणी- 52

(युवक कॉंग्रेसचे माजी अध्यक्ष खासदार राजीव सातव यांचे कोरोनामुळे 16 मे 2021 रोजी निधन झाले. मराठवाड्यासाठी हा एक मोठा धक्का आहे. त्यांना वाहिलेली ही श्रद्धांजली. )

कोरोनाचा बळी । उमदे लाघव ।

राजीव सातव । अनंतात ॥

साधेसे बोलणे । आदबीचा सुर ।

गेला दूर दूर । दिगंतात ॥

अवकाळी आले । आभाळ भरून ।

काळीज चिरून । म्हाराष्ट्राचे ॥

बनवूनी गेला । आम्हासी अनाथ ।

तेव्हा ‘गोपीनाथ’ । अकालीच ॥

मिटला ‘प्रमोद’ । जाहलो उदास ।

मावळे ‘विलास’ । अवेळीच ॥

काय भोग आहे । मराठवाड्याचा ।

ढासळे वाड्याचा । चिरा चिरा ॥

कयाधूचा काठ । कांत आज शांत ।

उसळे आकांत । अंतरंगी ॥

(17 मे 2021)

उसंतवाणी- 53

(नारदा घोटाळ्यात सीबीआय ने ममतांच्या पक्षाचे चार नेते चौकशी साठी ताब्यात घेतले. त्या विरोधात त्यांनी सीबीआय न्यायालयात अर्ज केला. जमानत मिळवली. पण कोलकत्ता उच्च न्यायालयात या जमानतीलाच स्थगिती मिळाली. स्वत: ममता सीबीआय कार्यालयात 6 तास ठिय्या देवून बसल्या होत्या. )

चीटफंड घोळ । दीदी करे कल्ला ।

मुखी रोशगुल्ला । पुरोगामी ॥

सीबीआय कसे । तपासाचा फास ।

मंत्री नेते खास । अडकले ॥

घालून घेराव । सीबीआय कोंडी ।

लोकशाही चंडी । नाचतसे ॥

हिंसेचे चटके । लोक हे पळाले ।

निर्वासित झाले । स्वदेशात ॥

गरिबाचा निधी । घेती हिरावूनी ।

तोची ‘कटमनी’ । म्हणविती ॥

उद्योगां वाचून । बंगाल डबके ।

विकास थबके । जागेवरी ॥

कांत राज्य हवे । स्पष्ट कायद्याचे ।

भ्रष्ट फायद्याचे । कधी नको ॥

(18 मे 2021)

उसंतवाणी- 54

(भारताची मोदींची बदनामी करण्याची एक योजना टूलकिट मधून समोर आली. हे टूलकिट कॉंग्रेसच्या वतीने करण्यात आले असा आरोप भाजपने केला आणि अर्थातच कॉंग्रेसने त्याचा साफ इन्कार केला. हे खोटे असून त्यावर खटला दाखल करण्याची भूमिका घेतली. टूलकिटच्या माध्यमांतून करोना काळात भारताची प्रतिमा हनन करण्याचे मोहिम समोर येते आहे. ते फार गंभीर प्रकरण आहे. )

कोरोनाला म्हणू । मोदी व्हेरिएंट ।

वाहू दे करंट । विद्वेषाचा ॥

कुंभमेळ्यामुळे । कोरोना प्रसार ।

ऐसाची प्रचार । करू आम्ही ॥

नदीत वाहू की । स्मशानात जळो ।

प्रेत चित्र मिळो । छापायाला ॥

जळणारे प्रेत । दिसे मोठे छान ।

प्रतिमा हो घाण । भारताची ॥

आम्हास न दिसे । कृषी आंदोलन ।

ईदचे मिलन । कदापिही ॥

न्यूयॉर्क टाईम्स । वॉशिंग्टन पोस्ट ।

तिथे लिहू गोष्ट । देशद्वेषी ॥

कांत म्हणे जाणा । विकृती ही नीट ।

हेची ‘टूलकिट’ । कॉग्रेसचे ॥

(19 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग १७

उरूस, 16 मे 2021 

सलग पन्नास दिवस ‘उसंतवाणी’ लिहिली. रोज एक अभंग लिहित गेलो. पन्नाशी झाल्यावर एक आभार व्यक्त करणारा अभंग लिहिला आणि रोज लिहिणं शक्य नाही ही प्रमाणिक भावनाही मांडली. पण राजकिय परिस्थितीच अशी आहे की रोज काही तरी समोर येते आहे. आणि मग त्यावर प्रतिक्रिया उमटतेच. आताही महाराष्ट्र सरकारच्या मंत्री मंडळ बैठकीतील खडाजंगीचे प्रकरण समोर आले आणि मला विषय सापडला. सर्व रसिकांनी ज्या पद्धतीने प्रतिसाद दिला त्यासाठी सर्वांचे मन:पूर्वक अभार. 

उसंतवाणी- 49

(इस्त्रायल आणि पॅलिस्टीन यांच्यात परत एकदा संघर्ष सुरू झाला आहे. यावर आपले पुरोगामी सेव्ह गाझा म्हणत छाती बडवून घेत आहेत. दहशहवाद आणि इस्लाम यांचा अतुट संबंध आहे हे कसे दुर्लक्ष करणार? गेली 1 हजार वर्षे भारताने इस्लामी आक्रमणं सहन केली आहेत. त्याविरूद्ध आवाज उठवणार की नाही? )

मध्यपुर्वेमध्ये । पेटे गाझा पट्टी ।

पुरोगामी शिट्टी । भारतात ॥

चालला संघर्ष । ज्यू-मुसलमान ।

कापताती मान । सौहार्दाची ॥

इस्लामी जिहाद । चुकवितो ठोका ।

सर्व धर्म धोका । जगभर ॥

बामियाना बुद्ध । फोडियल्या मुर्ती ।

टॉवर वरती । हल्ला केला ॥

हजारो मंदिरे । हिंदूंची तोडली ।

सभ्यता गाडली । हिंसेखाली ॥

इस्लामी देशात । कुठे लोकशाही? ।

उत्तर ना काही । देते कुणी ॥

कट्टर पंथ्यांना । कठोर शासन ।

घालावी वेसण । कांत म्हणे ॥

(14 मे 2021)

उसंतवाणी- 50

(रोज एक अभंग असा 50 दिवस हा उपक्रम चालू आहे. आज याची पन्नाशी होते आहे. त्या निमित्ताने लिहिलेला हा अभंग. या पुढे रोज तर शक्य नाही पण नियमितपणे उसंतवाणी लिहिण्याचा मानस आहे.)

‘उसंतवाणी’ने । गाठली पन्नाशी ।

तूमचा पाठिशी । आशिर्वाद ॥

ज्ञाना नामा तुका । पायी लावू हात ।

केली सुरूवात । रचनेला ॥

जनमानसाचा । ओळखोनी भाव ।

शब्दांचा हा गाव । वसविला ॥

तुकोबा वर्णिती । तैसा मी हमाल ।

पल्याड मजाल । फार नाही ॥

करावे कौतुक । किंवा करा टिका ।

भाव आहे निका । मनातला ॥

लोकधारे मध्ये । सोडीले अभंग ।

भिजो त्यांचे अंग । जनप्रेमे ॥

कांत म्हणे लिहू । जेवढे सोसल ।

मिडिया सोशल । हाची बरा ॥

(15 मे 2021)

उसंतवाणी- 51

(मंत्री मंडळाच्या बैठकीत जयंत पाटील आणि मुख्य सचिव सिताराम कुंटे यांच्यात काही खडाजंगी झाल्याचे बाहेर आले. शिवसेना प्रवक्ते संजय राउत यांनी भांड्याला भांडे लागणारच. पण ही भांडी मजबूत स्टिलची आहेत असं पत्रकारांना सांगितलं. त्यावरून काही एक खडाजंगी परत घडली. )

कॅबिनेटमध्ये । भांडी वाजतात ।

बोल गाजतात । प्रवक्त्याचे ॥

वाझेच्या हप्त्याची । थांबता मलई ।

उडाली कल्हई । भांड्याची या ॥

काही भांडी राठ । ‘बारा’च्या मातीची ।

खेळती जातीची । कुटनीती ॥

मुख्य भांडे आहे । बसुनिया घरी ।

जणू अंड्यावरी । कोंबडी ही ॥

इटलीची काही । भांडी ही ठिसूळ ।

मोडती समूळ । सत्तेविना ॥

ताटा भोवतीला । वाट्या पेले तांब्या ।

अपक्ष हा ठोंब्या । तैसा असे ॥

कांत परमवीरे । उघडला कट ।

आदळ आपट । त्याचमुळे ॥

(16 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग १६

 

उरूस, 13 मे 2021 

उसंतवाणी- 46

(शिवसेना प्रवक्ते संजय राउत यांनी ममता बॅनर्जी यांची तुलना अहिल्याबाई होळकर यांचेशी केली. त्यामुळे इंदूर संस्थानच्या वंशजांनी त्यावर आक्षेप घेत मुख्यमंत्री उद्धव ठाकरे यांना जाब विचारणारे एक पत्र लिहिलं. )

अहिल्या-ममता । करितो तुलना ।

संजय शहाणा । बडबडा ॥

नाव याचे ठेवू । बरळू राऊत ।

कुबुद्धीला ऊत । सदोदीत ॥

कुठे पुण्यश्लोक । राणी ती विचारी ।

कुठे हिंसाचारी । ममता ही ॥

जिर्णोद्धार तेव्हा । भग्न मंदिरांचा ।

जित्या माणसांचा । खुन आता ॥

उद्धवासी पत्र । लिहुनिया जाब ।

मागती हिसाब । होळकर ॥

संजयासी लावा । लगाम कडक ।

नसता धडक । ठोकु दावा ॥

बोलावे तो गप्प । नको तो वाचाळ ।

कांत हा ढिसाळ । कारभार ॥

(11 मे 2021)

उसंतवाणी- 47

(कृषी आंदोलनाचा काळा चेहरा महिला बलात्कार प्रकरणी समोर आला. ही तरूणी कोरोनाने मृत्युमुखी पडली. तिच्या वडिलांनी तिच्यावर झालेल्या बलात्काराची तक्रार नोंदवली. त्यानुसार सहा जणांवर हरियाणा पोलिसांनी गुन्हा दाखल केला. या महिलेने आपल्यावरील अत्याचाराची कल्पना योगेंद्र यादव सारख्या नेत्यांकडे केली होती हे पण आता उघड झाले आहे.)

कृषी आंदोलन । दावी चमत्कार ।

होई बलात्कार । तरूणीचा ॥

आता नाही मार्च । घेवून कँडल ।

कुणी ना सँडल । उगारली ॥

तिचा झाला मृत्यू । कोरोनाची बाधा ।

विचारी ना साधा । प्रश्‍न कुणी ॥

टिकैत यादव । हानन हा मौला ।

आज सारा कल्ला । शांत कसा? ॥

खाणे ‘पिणे’ मजा । वासनेचा खेळ ।

आंदोलन स्थळ । तमाशा हा ॥

कोरोना बाधेचा । बनलाय बॉंम्ब ।

कृषी हित बोंब । खोटी खोटी ॥

नाही शेतकरी । कांत हे दलाल ।

तोंड करा लाल । कायद्याने ॥

(12 मे 2021)

उसंतवाणी- 48

(अभियांत्रिकी महाविद्यालयाचा माजी विद्यार्थी बालाजी राठोड यांचे अगदी तरूण वयात 25 वर्षे कोरोनाने दिल्लीत निधन झाले. त्याच्या कुटूंबाला आमच्या माजी विद्यार्थी संघटनेच्या वतीने 10 लाखाची मदत करण्यात आली. ही रक्कम अगदी साध्या व्हाटसअप मेसेजवर एका दिवसांत जमा झाली. कोरोनाशी सामान्य माणसं स्वत: लढत आहेत आणि इतरांना मदत करत आहेत ही मला फारच मोलाची गोष्ट वाटली. )

साध्या माणसांचा । हातामध्ये हात ।

कोरोनाला मात । देण्यासाठी ॥

कुठे ना प्रसिद्धी । कुठे नाही नाव ।

वेदनेचा ठाव । थेट घेती ॥

चांगल्या कामाची । ना कुठे बातमी ।

ना‘बात’ नाही‘मी’। त्यांच्यापाशी ॥

बुद्धीवान सारे । करतात चर्चा ।

सांभाळून खुर्च्या । आपापल्या ॥

स्वत:च्या दु:खाचे । दाबुनिया कढ ।

दूज्यांसाठी चढ । ओलांडिती ॥

साध्यांमुळे खरी । चालते दुनिया ।

मोठ्यांची किमया । प्रसिद्धीची ॥

कांत म्हणे धरा । जनहित कास ।

बाकी बकवास । ढोंग सारे ॥

(13 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग १५

 

उरूस, 8 मे 2021 

उसंतवाणी- 43

(बेळगांव मध्ये लोकसभेची पोटनिवडणुक झाली. यात दिवंगत शरद अंगडी यांच्या पत्नी मंगला अंगडी यांना भाजपने तिकिट दिले होते आणि त्याच विजयी झाल्या. कॉंग्रेस उमेदवार दुसर्‍या क्रमांकावर राहिला. पण ही निवडणुक महाराष्ट्र एकिकरण समितीने पण लढवली होती. त्यांच्या उमेदवाराला केवळ 11 टक्केच मते मिळाली. शिवसेनेचे संजय राउत या उमेदवाराचा प्रचार करायला मोठ्या उत्साहाने गेले होते.)

बेळगांवमध्ये । झाला पराभव ।

कडू झाली चव । अस्मितेची ॥

मराठीचा मुद्दा । मागे पडे आता ।

कशासाठी गाता । व्यथा गान ॥

नि:संदर्भ झाले । महाराष्ट्रवादी ।

फुका वादावादी । कानडीशी ॥

नवे तंत्रज्ञान । भाषेला वापरू ।

मराठी उद्धरू । प्राणपणे ॥

महाराष्ट्र नको । मराठीची सीमा ।

गोदावरी भीमा । ओलांडावी ॥

ज्ञाना तेंव्हा म्हणे । ‘विश्वात्मके देवे’ ।

आज हेवे दावे । कशासाठी? ॥

कांत झळकू द्या । मराठीचा झेंडा ।

ऐसा राजबिंडा । विश्वभर ॥

(8 मे 2021)

उसंतवाणी- 44

(लॉकडाउन मध्ये दारू दुकानं बार बंद पडल्याने त्याची चिंता वाटून यांना वीज बिलात माफी द्या, कर सवलत द्या अशी मागणी करणारे पत्र शरद पवारांनी मुख्यमंत्र्यांना लिहिले.)

दारूवाल्यांसाठी । पवारांचे पत्र ।

दर्शविते सुत्र । जिव्हाळ्याचे ॥

रसिक हे राज्य । राहू नये गद्य ।

म्हणूनिया मद्य । मोलाचे हे ॥

शुगर इंडिस्ट्री । निर्मिते मळीला ।

या तळमळीला । जाणा जरा ॥

तहानेला जणू । महाराष्ट्र तान्हा ।

सोमरस पान्हा । फुटे यांना ॥

पाणी गढूळ नी । दारू हो नितळ ।

चमके पितळ । व्यवस्थेचे ॥

दारूच्या कल्याणा । नेत्यांच्या विभुती ।

वाईट प्रकृती । असताना ॥

कांत म्हणे नका । मारू कुठे बोंब ।

डोळा यांच्या थेंब । मद्यार्काचा ॥

(9 मे 2021)

उसंतवाणी- 45

(नागपाडा मुस्लिम वस्तीत 7 कि.ग्रॅ. युरेनमचा साठा सापडला. पोलिसांनी दोन आरोपींना अटक केली.  अबू ताहिर अफजल हुसेन आणि महोम्मद जिगर अशी त्यांची नावे आहेत. हा तपास 9 मे रोजी एनआयए ने ताब्यात घेतला आहे.)

जिलेटीन झाले । आता युरेनम ।

नरम गरम । मुंबई ही ॥

शांतीदुता घरी । सापडला साठा ।

नको रे बोभाटा । करू कुणी ॥

पवित्र हा सुरू । रोज्याचा महिना ।

कुणी ना पाहिना । त्यांच्याकडे ॥

सणासुदी पोर । लावी फुलझडी ।

युरेनम लडी । तैसेची ही ॥

काका मशीदीत । स्फोट करी खोटा ।

तैसा खेळ छोटा । जाणा जरा ॥

एनआयए ताब्यात । घेतला तपास ।

झाला रे खल्लास । खेळ सारा ॥

इथे ना स्वातंत्र्य । करण्यास हल्ला ।

वाचव रे अल्ला । कांत म्हणे ॥

(10 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग १४

उरूस, 7 मे 2021 

उसंतवाणी- 40

(प.बंगाल निवडणुकांच निकाल लागल्यावर तिथे हिंसाचाराचा आगडोंब उसळला. विरोधी पक्षांचे शिरकाण करण्याचे तृणमुलच्या गुंडांची ही भयानक खेळी अंगावर काटा आणणारी आहे. )

विजयाची निघे । इथे अंत्ययात्रा ।

बंगाली ही ‘जात्रा’ । विचित्रच ॥

दारी उभारून । विजयी मांडव ।

हिंसेचे तांडव । चालविती ॥

सत्तेचा उन्माद । पेटविती घरे ।

‘ममतेचे’ झरे । आटलेले ॥

पुरोगामी ढोंगी । बोलेना मुखाने ।

पाहती सुखाने । जाळपोळ ॥

नवरा मरू दे । सवत रंडकी ।

खुशीत ढोलकी । लिब्रांडुंची ॥

नंदीग्राम हार । लागते जिव्हारी ।

सुरू मारामारी । आयोगाशी ॥

मतदारे दिली । अपात्राला खुर्ची ।

छातीमध्ये बर्ची । कांत म्हणे ॥

(5 मे 2021)

उसंतवाणी- 41

(सर्वौच्च न्यायालयाने 5 मे रोजी मराठा आरक्षणाचा महाराष्ट्र सरकारचा निर्णय रद्द ठरवला. गेली 5 वर्षे मराठा तरूणांना भडकावण्याचे जे राजकारण मराठा नेतृत्वाने केले त्याला मोठी फटकार बसली आहे. शेतकरी चळवळीने सातत्याने शेतमालाचा भाव हाच मराठा समाजासाठी कळीचा मुद्द असल्याचे सांगितले होते. )

कोर्टाने रोखता । कायद्याचे शिंग ।

आरक्षण बिंग । फुटतसे ॥

मराठा नेतृत्व । झाले असे भोंदू ।

कुजविला मेंदू । तरूणांचा ॥

कुणब्याची मोठा । शेतमाल भाव ।

आरक्षण हाव । कुचकामी ॥

खरे हकदार । दलित दुबळे ।

पिडीत सगळे । शतकाचे ॥

पैसा शिष्यवृत्ती । द्यावे अनुदान ।

साधते कल्याण । इतरांचे ॥

आरक्षण नाही । त्यावरी उपाय ।

होतसे अपाय । सामाजिक ॥

कांत आरक्षण । आहे खुळखुळा ।

बनवते बुळा । सक्षमासी ॥

(6 मे 2021)

उसंतवाणी- 42

(प.बंगालात ममता बॅनर्जी यांचा जो विजय झाला त्यामागे शरद पवारांचा हात असल्याचे उपहासात्मक वक्तव्य भाजपचे बंगाल प्रभारी कैलास विजय वर्गीय यांनी केले होते. त्याचा आधार घेवून महाराष्ट्रात राष्ट्रवादीचे नेते, पुरोगामी आणि पत्रकार यांनी शरद पवारांचे गुणगान सुरू केले. प्रत्यक्षात पंढरपुर विधानसभा पोट निवडणुकीत राष्ट्रवादीचा पराभव झाला. म्हणजे आपली साधी आमदारकीची जागा राखता येत नाही आणि चालले ममतांच्या विजयाचे श्रेय घ्यायला.)

बंगाली विजय । पवारांचा हात ।

मारितसे बात । पुरोगामी ॥

पार नाही कधी । सत्तरीचा टप्पा ।

बहुमत गप्पा । मारताती ॥

युपीए अध्यक्ष । संजय उवाच ।

बोलतो उगाच । काही बाही ॥

खासदार नाही । दोन आकड्यांत ।

खेळी वाकड्यांत । सदोदीत ॥

ममताने सत्ता । आणली खेचून ।

कॉंग्रेस त्यागून । स्वाभिमाने ॥

शरद चांदणे । कधी लाडीगोडी ।

कधी करी तोडी । कॉंग्रेसशी ॥

कांत कुटनीती । ऐसी ‘बारा’मती ।

कैसी सद्गती । लाभणार ॥

(7 मे 2021)

उसंतवाणी - राजकीय उपहास- भाग १३

     

उरूस, 4 मे 2021 

उसंतवाणी- 37

(पाच राज्यांतील निवडणुकांचे एक्झिट पोल चे निकाल जाहिर झाले आणि त्यात कॉंग्रेस सफाचाट होताना दिसत आहे)

अंदाज सांगती । एक्झिट हे पोल ।

पूर्ण पोल खोल । कॉंग्रेसची ॥

प्रचाराच्याविना । हारतो बंगाल ।

आसामात हाल । सभांमुळे ॥

पावे ना डुबकी । केरळी निराळी ।

पक्षात बंडाळी । माजलेली ॥

तामिळनाडूत । ठरे लिंबु टिंबू ।

पद्दुचेरी तंबू । उखडला ॥

आजमल कुठे । कुठे हा फुर्फुरा ।

ओढी फराफरा । कॉंग्रेसला ॥

बंगालात डावे । गळ्यातमध्ये गळा ।

केरळात विळा । विरोधाचा ॥

राहूल साधतो । कांत म्हणे मौका ।

बुडविण्या नौका । कॉंग्रेसची ॥

(1 मे 2021)

उसंतवाणी- 38

(पाच राज्यांतील निवडणुकांचे निकाल जाहिर झाले. असम, बंगाल, केरळात सत्ताधारी कायम राहिले. बंगालात ममतांचा मोठा विजय झाला पण त्या स्वत: मात्र हरल्या. )

आसाम बंगाल । केरळात सत्ता ।

सांगतसे पत्ता । पूर्वीचाच ॥

तामिळनाडूत । द्रमुक स्टॅलीन ।

सावध चालीनं । डाव जिंकी ॥

गड आला पण । सिंहीणीच गेली ।

सुवेंदूू टिपली । बंगालात ॥

डाव्यांची कमाल । केरळात खुर्ची ।

बंगालात मिर्ची । लालेलाल ॥

केरळात हाफ । असामात माफ ।

बंगालात साफ । कॉंग्रेस ही ॥

बंगाली कमळ । झाली दमछाक ।

वाचविले नाक । कसेबसे ॥

कांत मतदार । शहाणा नी सुज्ञ ।

पार पाडी यज्ञ । लोकशाही ॥

(3 मे 2021)

उसंतवाणी- 39

(पंढरपुर मतदार संघात विधानसभेची पोटनिवडणुक होती. यात भाजपच्या समाधान अवताडे यांनी राष्ट्रवादीच्या भगीरथ भालके यांचा पराभव केला. भारत भालके यांच्या निधनामुळे ही पोट निवडणुक होत होती. प्रचारात अजीत पवारांनी ‘कोण तो माईचा लाल’ अशी भाषा वापरली होती. )

बंगाली विजय । वाजविती डंका ।

पंढरीत लंका । पेटलेली ॥

तिघाडीची नौका । पंढरपुरात ।

भाजपे पुरात । बुडविली ॥

सहानुभूतीचा । बांधला भोपळा ।

रचला सापळा । वाया जाई ॥

दादा म्हणे कोण । माईचा तो लाल ।

आपुलाच गाल । थोबाडीला ॥

‘भगीरथ’ केल्या । किती तडजोडी ।

‘समाधान’ गोडी । नाही त्यात ॥

‘पुन्हा मी येईन’ । वाटू लागे भिती ।

धडधडे छाती । मातोश्रीची ॥

कांत सत्ता माज । दावी जो अट्टल ।

तसाची विठ्ठल । हाणी रट्टा ॥

(4 मे 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग १२

    

उरूस, 3 मे 2021 

उसंतवाणी-34

( आप सरकारने न्यायमुर्ती आणि त्यांचे कुटूंब व न्यायालयीन कर्मचारी यांच्यासाठी पंचतारांकित हॉटेल अशोक मध्ये 100 बेड राखीव ठेवण्याचा निर्णय घेतला करोनासाठी. त्यावर टाईम्स नाउने आवाज उठवला. उच्च न्यायालयाने सुमोटा दाखल करून घेवून आप सरकारला फटकारले. आम्ही अशी सोय मागितलीच न्हवती. सामान्य लोकांचे हाल होत आहेत त्याकडे लक्ष द्या असे सुनावले. )

उच्च न्यायालय । देई फटकार ।

‘आप’ सरकार । कोडगे हे ॥

औषध मिळेना । नाही ऑक्सिजन ।

फिरे वण वण । रूग्णाईत ॥

न्यायमुर्तीसाठी । हॉटेल अशोक ।

लोकांसाठी शोक । मरणाचा ॥

न्यायालय राखे । सन्मान आपला ।

आदेश रोकला । केजरूचा ॥

ऑक्सिजन प्लांट । नाही उभा कैसा? ।

खर्च केला पैसा । ‘ऍड’पायी ॥

चळवळ होती । तेव्हा होता ‘आप’ ।

आता झाला खाप । मध्ययुगी ॥

कांत सत्ता नशा । चढे लवकर ।

हिताचा विसर । जनतेच्या ॥

(29 एप्रिल 2021)

उसंतवाणी-35

(नारायणराव दाभाडकर हे 85 वर्षांचे नागपुर येथील वृद्ध गृहस्थ. त्यांनी आपला बेड नाकारला व दुसर्‍या गरजूला देण्याची विनंती केली. घरी जाणे पसंद केले. दोन दिवसांत त्यांचे कोरोनाने निधन झाले. त्यावरून एक गदारोळ पुरोगामी पत्रकार व इतरांनी उठवला. एखाद्याच्या मृत्यनंतर त्याच्या त्यागाची विटंबना करणे हे अतीच झाले. )

मृत्यूच्या नंतर । केली विटंबना ।

हाणा नारायणा । दोन यांना ॥

सारासार इथे । बुद्धी निजलेली ।

वृत्ती कुजलेली । पत्रकारी ॥

तुम्हा देती शिवी । म्हणती संघोटा ।

सुटला कासोटा । विवेकाचा ॥

कळणार कशी । त्यांना जनसेवा ।

सत्ता सुका मेवा । द्रव्यासवे ॥

आपुल्या त्यागाची । करावी प्रसिद्धी ।

साधे ऐसी सिद्धी । तोची खरा ॥

तुमच्या घरचे । सारे लोक येडे ।

नाकारती पेढे । फायद्याचे ॥

पत्रकारितेची । निघे अंत्ययात्रा ।

विकृती हा खत्रा । कांत म्हणे ॥

(30 एप्रिल 2021)

उसंतवाणी-36 

(1 मे हा महाराष्ट्र दिन. या निमित्ताने उठता बसता छ. शिवाजी महाराजांचे नाव घेणारे आजचे राज्यकर्ते ते कसं वागतात आणि महाराजांच्या काळात कसं होतं याची तुलना सांगणारी रचना. )  

गर्जा महाराष्ट्र । कसा म्हणू माझा ।

‘वाजे’ बँडबाजा । पोलिसांचा ॥

महाराष्ट्र होता । सह्याद्रीचा कडा ।

घरात कोंबडा । आज बसे ॥

सुरत लुटून । स्वराज्य मांडणी ।

‘बार’ची खंडणी । कुणासाठी ॥

अफ्जल खान । काढीला कोथळा ।

आजचा मथळा । ‘सामना’त ॥

गडासाठी तेंव्हा । सिंह गेला बळी ।

वसुलीची खेळी । आज येथे ॥

अष्टप्रधान ते । राज्य करी सुखी ।

आज ‘देशमुखी’ । हप्तेबाज ॥

कांत म्हणे आज । आहे एकसष्ठी ।

राज्यहित षष्ठी । कोण करी ॥

(1 मे 2021, महाराष्ट्र दिन)

श्रीकांत उमरीकर, जनशक्ती वाचक चळवळ, औरंगाबाद 9422878575