उसंतवाणी - राजकीय उपहास- भाग ३०

 

उरूस, 24 जून  2021 

उसंतवाणी- 88

(प्रशांत किशोर शरद पवारांना मुंबईला येवून भेटले आणि आज 22 जून रोजी 15 पक्षांच्या नेत्यांची शरद पवारांसह ते दिल्लीत भेट घेत आहेत. यातील कुठलाच नेता खासदार संख्येच्या दृष्टीने हेव वेट नाही. म्हणूनच याची टिंगल केली जात आहे.)

‘किशोर’ बळाने । काका मारी उड्या ।

उठल्या वावड्या । दिल्लीमध्ये ॥

रांगत्या बाळाची । जशी बाबा गाडी ।

तिसरी आघाडी । मोठ्यांची ही ॥

डंगरे बैल नी । भाकड गायींचा ।

बोलण्या सोयीचा । वृद्धाश्रम ॥

लोहियां पासून । चालू आहे खेळ ।

जमला न मेळ । अजूनही ॥

जनता दलाचे । कित्येक तुकडे ।

शरीर लुकडे । राजकिय ॥

दीड दिस राज्य । शिराळ शेटचे ।

औट घटकेचे । तैसेची हे ॥

कांत बिनकामी । कुच्चर हा वट्टा ।

राजकिय थट्टा । चालू आहे ॥

(22 जून 2021)

उसंतवाणी- 89

(शरद पवारांच्या घरी कॉंग्रेसतर भाजपेतर विरोधी पक्षांची एक बैठक बोलविण्यात आली होती. तिला कुठलाच मोठा नेता उपस्थित राहिला नाही. मग घुमजाव करत ही यशवंत सिन्हांनी स्थापन केलेल्या राष्ट्र मंच या अराजकिय संघटनेची बैठक होती असे घोषित करण्यात आले. एकुणच सारा बार फुसका निघाल्याचे स्पष्ट झाले.)

पवारांच्या घरी । यजमान सिन्हा ।

वाजवितो कान्हा । का बांसरी? ॥

फिरकला नाही । नेता मोठा अन्य ।

शुन्यापाशी शुन्य । शुन्य होयी ॥

सिन्हांचे खेळणे । ऐसा ‘राष्ट्रमंच’ ।

गणंगांचा संच । कुचकामी ॥

बुडाला बेडुक । उडाला कावळा ।

काकांचा आगळा । डावपेच ॥

काकांची ही भाषा । नर वा कुंजीर ।

पाठीत खंजीर । खुर्चीसाठी ॥

गाढवही गेले । गेले ब्रह्मचर्य ।

सारे हतवीर्य । मोदीपुढे ॥

कांत शोभतसे । संन्यास आश्रम ।

गाठीभेटी श्रम । कशासाठी? ॥

(23 जून 2021)

उसंतवाणी- 90

(उत्तर प्रदेश मध्ये मुक बधीर दिव्यांग, गरीब कुटुंबातील तरूण मुली यांचे लालच देवून धर्मांतर करण्याचे प्रकरण समोर आले. एक दोन नव्हे तर 2 हजार इतक्या मोठ्या संख्येने हे धर्मांतर करण्यात आले. या बाबत उत्तर प्रदेश पोलिसांनी कारवाई सुरू केली आहे.)

मुक बधीरांचे । केले धर्मांतर ।

प्रदेश उत्तर । प्रश्‍न झाला ॥

गावा गावातील । कुटुंब हेरून ।

दिव्यांग तरूण । बाटविले ॥

मुळात हे लोक । बुद्धिनेच अधु ।

अमिशाचा मधु । चाखविला ॥

पैसा नि नौकरी । जागा दिली पॉश ।

केले ब्रेनवॉश । एक एक ॥

कायद्याने सारे । सुजाण वयात ।

गुन्हा नाही यात । सिद्ध होई ॥

पालक बिचारा । मोकलून रडे ।

कानामध्ये दडे । समाजाच्या ॥

कांत म्हणे जाणा । जागतिक कट ।

करू कडेकोट । बंदोबस्त ॥

(24 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २९

 

उरूस, 21 जून  2021 

उसंतवाणी- 85

(कॉंग्रेस प्रदेशाध्यक्ष नाना पटोले यांनी येत्या सर्व निवडणुका कॉंग्रेस स्वबळावर लढणार असल्याचे घोषित केले. त्यांच्या वक्तव्यावर प्रतिक्रिया देताना संजय राउत यांनी शिवसेना आणि राष्ट्रवादी यांनी एकत्रित यावे असे सुचवले.)

पटोले बोलले । दाखवू स्वबळ ।

झाली खळबळ । आघाडीत ॥

भिवयी उडवे । बोलले राऊत ।

स्वबळा ये ऊत । आज कसा? ॥

कॉंग्रेस भाजप । लढती वेगळे ।

सेनेचे मावळे । मोकळेची ॥

राष्ट्रवादी त्यांना । घेई कडेवरी ।

सत्ता कॅडबरी । मुखामध्ये ॥

रानातला वाघ । आला सर्कशीत ।

खुर्चीच्या खुशीत । हुरळला ॥

जोरात उमटे । बाटग्याची बांग ।

नाना म्हणे टांग । माझी वर ॥

कांत आघाडीत । जमा झाले बुळे ।

काय हे स्वबळे । लढणार ॥

(19 जून 2021)

उसंतवाणी- 86

(शिवसेनेच्या वर्धापन दिना निमित्त उद्धव ठाकरे यांनी ममता दिदींची त्यांच्या पक्षाची स्तुती केली. प्रादेशीक पक्षांचे महत्त्व प्रतिपादीत केले. नाना पटोले यांच्या स्वबळाच्या घोषणेवर त्यांना काही स्पष्ट भूमिका घेता येईना. मग त्यांनी शब्दांची कसरत करत स्वबळाची व्याख्या केली.  )

उद्धवाने केली । स्वबळाची व्याख्या ।

जागमध्ये आख्ख्या । ऐसी नाही ॥

अन्यायाविरूद्ध । मनगटी बळ ।

म्हणजे स्वबळ । बोलले ते ॥

निवडणुकांना । म्हणती दुय्यम ।

हारता संयम । राखा म्हणे ॥

तोंडफाड स्तुती । ममता दिदीची ।

सत्तेच्या गादीची । प्रादेशीक ॥

तीन आकड्यांत । नाही आमदार ।

बुडबुडे फार । शब्दांचेच ॥

वर्धापन दिन । नाही डरकाळी ।

बें बें करी शेळी । शिवसेना ॥

बाळासाहेबांचा । गेला तो दरारा ।

कांत हे खरारा । करणारे ॥

(20 जून 2021)

उसंतवाणी- 87

(शिवसेना आमदार प्रताप सरनाईक यांनी मुख्यमंत्री उद्धव ठाकरे यांना एक पत्र लिहून परत भाजपशी जूळवून घेण्याचा आग्रह धरला आहे. कॉंग्रेस राष्ट्रवादीवाले आपल्याच पक्षाला फोडत असल्याचा आरोपही त्यांनी केला आहे. शिवाय येत्या मनपा निवडणुकीत पक्षाला अवघड जाईल असं प्रतिपादन केले आहे. )

सरनाईकांचा । सुटला रे धीर ।

चौकशीचा तीर । काळजात ॥

उद्धवासी सांगे । लिहूनिया चिठ्ठी ।

पुरे झाली कट्टी । भाजपाशी ॥

जावुनिया भेटा । नरेंद्र मोदीला ।

सत्तेच्या गादीला । साथीदार ॥

कॉंग्रेसी बेरके । सत्तेच्या तुपाशी ।

सेनेचा उपाशी । कार्यकर्ता ॥

मुख्यमंत्री पद । देवुनी आवळा ।

काढला कोहळा । सत्तेचा हा ॥

होईनात कामे । हलेना फाईल ।

केरात जाईल । मुसळ हे ॥

कांत म्हणे सुरू । वाटणीचा तंटा ।

बदलाची घंटा । वाजू लागे ॥

(21 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २८

 

उरूस, 18 जून  2021 

उसंतवाणी- 82

(राम मंदिर न्यासाच्या नविन जागो खरेदी प्रकरणांत काहीतरी खुसपट काढून विरोधक गदारोळ माजवित आहेत. ही जमिन खासगी मालकीची असून मुळ जमिनीला लागून असल्याने न्यासाने खरेदी करायचे ठरवले. तिचा जूना वाद मिटवून जूना व्यवहार पूर्ण करून नविन बाजारातील दराप्रमाणे किंमत मोजून जमिन खरेदी झाली. सगळा व्यवहार बँक खात्यातून झाला. पण काहीतरी गदारोळ उठवणे हेच एकमेक कर्तव्य बनल्यासारखे विरोधक वागत आहेत. )

रामाच्या नशिबी । पुन्हा वनवास ।

चर्चा बकवास । जमिनीची ॥

पारदर्शी सारा । बँक व्यवहार ।

तरी करी वार । विरोधक ॥

भक्तांनी देवूनी । उत्स्फुर्त देणगी ।

भरली कणगी । मंदिराची ॥

भव्य मंदिराचे । सुरू झाले काम ।

आणती हराम । अडथळे ॥

रावणाने नेली । जानकी लंकेला ।

तैसेची शंकेला । बात नेली ॥

लोकमानसीचा । जाणती न राम ।

जाहले नाकाम । पुरोगामी ॥

होवो निरसन । शंका नि कुशंका ।

जळो त्यांची लंका । कांत म्हणे ॥

(16 जून 2021)

उसंतवाणी- 83

(उत्तर प्रदेशात गाझियाबाद येथे एका वृद्ध मुस्लिमास मारहाण करतानाचा व्हिडिओ ट्विटरवर आला. जय श्री राम म्हण नसल्याने त्याला मारहाण केल्याची ती घटना होती. प्रत्यक्षात हा व्हिडिओ मारहाणीचा आहे पण त्याचा संबंध जय श्रीरामशी नाही असे पोलिसांनी तपासात स्पष्ट केले. ज्यांनी ज्यांनी ट्विटरवर हे शेअर केलं त्यांच्यावर एफआयआर दाखल करण्यात आला. )

देश विघातक । ट्विटर ट्विटर ।

वाहते गटर । सेक्युलर ॥

मुसलमानासी । हिंदूंनी चोपले ।

दाढीस कापले । म्हणे ऐसे ॥

तपास करता । समोर ये सत्य ।

खोट्याचे अपत्य । मिरवती ॥

जोरात पसरू । अफवेची हवा ।

तपावू या तवा । राजकिय ॥

खोटे ट्विटवाले । सगळे गोत्यात ।

योगीने पोत्यात । घातले हे ॥

नोंदवल्या गेला । एफ.आय.आर. ।

कायद्याचा मार । सोसा आता ॥

‘कांत’ स्वातंत्र्याची । कैसी अभिव्यक्ती ।

शिव्या देणे सक्ती । हिंदूलाच ॥

(17 जून 2021)

उसंतवाणी- 84

(मनसुख हिरन हत्या, एंटिलिया केस या प्रकरणात एनआयए ने एन्काउंटर स्पेशलिस्ट प्रदीप शर्माला ताब्यात घेतले. त्याचा या सर्व प्रकरणांत हात असल्याचे पुरावे समोर आले आहेत. प्रदीप शर्मा शिवसेनेच्या तिकीटावर विधानसभा निवडणुकीत उभा होता. )

ताब्यात घेतले । प्रदीप शर्माला ।

लागला वर्माला । बाण ऐसा ॥

एंटिलिया केस । हिरेनचा घात ।

यात होता हात । स्पष्ट झाले ॥

दहा अधिकारी । घेतले ताब्यात ।

‘मातोश्री’ गोत्यात । तडफडे ॥

शर्माला तिकिट । विभानसभेला ।

सेनेने शोभेला । दिले होते? ॥

तपासाचे जाती । कुठवर धागे ।

कोण पाठीमागे । कशासाठी? ॥

शर्माच्या हाताने । शंभराच्या वर ।

एनकाउंटर । कुणी केले ॥

घातक साखळी । नेते अधिकारी ।

संपो गुन्हेगारी । कांत म्हणे ॥

(18 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग 27

उरूस, 15 जून  2021 

उसंतवाणी- 79

(दिल्लीत आणि गल्लीत भेटीगाठींचे सत्र सुरू झाले आहे. मुख्यमंत्री उद्धव ठाकरे पंतप्रधान नरेंद्र मोदींना भेटले. देवेंद्र फडणवीस शरद पवारांना भेटले. प्रशांत किशोर शरद पवारांना भेटले. असं सर्व चालू आहे. )

गल्लीत दिल्लीत । सुरू गाठीभेटी ।

पडद्याच्या पाठी । हालचाली ॥

मोदी विरोधात । उठवतो ‘शोर’ ।

भेटतो किशोर । पवारांना ॥

देवेंद्र गाठतो । पवारांची गल्ली ।

उद्धवासी दिल्ली । आठवते ॥

राकेश टिकैत । ममताच्या दारी ।

आंदोलन दोरी । सोपविण्या ॥

भेटी नी बैठका । चाले धामधुम ।

फक्त सामसुम । कॉंग्रेसींची ॥

पहिली दुसरी । तिसरी आघाडी ।

धावतसे गाडी । राजकिय ॥

‘कांत’ म्हणे चालो । किती गाठीभेटी ।

सुटू दे रे गाठी । समस्यांच्या ॥

(14 जून 2021)

उसंतवाणी- 80

(कॉंग्रेसचे ज्येष्ठ नेते दिग्विजय सिंह यांनी नेहमीप्रमाणे बोलून परत एकदा कॉंग्रेसला अडचणीत आणले आहे. कॉंग्रेस सत्तेत आली तर 370 कलम परत कश्मिरात लागू करू असे एका पाकिस्तानी पत्रकाराशी बोलताना ते म्हणाले. क्लब हाउस वर ऑन लाईन चर्चेतील त्यांचे हे वक्तव्य बाहेर आले आहे.  )

जिभेला लावली । फटाक्याची लड ।

उडे तडतड । दिग्विजय ॥

कश्मिरात पुन्हा । तिनशे सत्तर ।

म्हणे हे उत्तर । समस्येचे ॥

कॉंग्रेसींचा मेंदू । आहे पाक व्याप्त ।

तेची यांचे आप्त । भावकीच ॥

मुस्लिमांपुढती । लांगुल चालन ।

फाडती चलन । सेक्युलर ॥

किती उडविला । हिरवा गुलाल ।

सत्तेवीना हाल । संपेचिना ॥

मुस्लिम म्हणजे । वोट बँक फक्त ।

ऐसे नासे रक्त । लोकशाही ॥

‘कांत’ म्हणे ऐसी । देशद्रोही थट्टा ।

द्यावा यांना रट्टा । कायद्याने ॥

(14 जून 2021)

उसंतवाणी- 81

(संजय राउत, नाना पटोले आणि राष्ट्रवादीचे प्रवक्ते नवाब मलिक सारखं काहीतरी बोलत असतात. राउत यांनी पाच वर्षे सेनेचाच मुख्यमंत्री राहणार असे विधान केले. नाना पटोले यांनी कार्यकर्त्यांना संबोधीत करताना तुमच्या मनातला मुख्यमंत्री मीच आहे अशी मल्लीनाथी केली. सुप्रिया सुळे यांना अडिच वर्षे मुख्यमंत्री पद मिळावं अशी एक चर्चा राष्ट्रवादीने शांतपणे सुरू केली आहे.)

नेहमीप्रमाणे । संजय उवाच ।

बोलतो उगाच । काहीबाही ॥

भाजपा सोबत । जाहली निलामी ।

सेनेने गुलामी । सोसली ही ॥

काकांच्या कृपेने । मुख्यमंत्री पद ।

चढे सत्ता मद । भलताच ॥

मुख्यमंत्री पद । पाच वर्षे हमी ।

त्याच्याहून कमी । काही नाही ॥

पटोले बोलले । वाजवा वाजंत्री ।

मीच मुख्यमंत्री । भविष्यात ॥

अर्ध्या काळासाठी । बसवा ताईला ।

आलीये घाईला । राष्ट्रवादी ॥

कांत म्हणे ऐसी । आघाडीची जत्रा ।

कारभारी सत्रा । सत्यानाश ॥

(15 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २६

 

उरूस, 12 जून  2021 

उसंतवाणी- 76

(राष्ट्रवादी कॉंग्रेसचा 10 जून हा वर्धापनदिन. 22 वर्षाच्या या पक्षाला तीन आकडी आमदार आणि दोन आकडी खासदार संख्या गाठता आली नाही. राष्ट्रवादीचे नेते शरद पवार आणि पक्षातील इतर सर्वच ज्येष्ठ नेत्यांनी यासाठी आत्मपरिक्षण केले पाहिजे. )

बाविशीची आज । झाली राष्ट्रवादी ।

मोठी झेप कधी । घेणार ही? ॥

तीन आकड्यांत । नाही आमदार ।

नाही खासदार । दोन अंकी ॥

आंबेडकर नी । फुले शाहू वादी ।

स्व-समाजवादी । म्हणविती ॥

सातत्य कधी ना । दिसे धोरणांत ।

मुतू धरणात । भाषा एैसी ॥

घरात पोसले । लाडावले टगे ।

बाहेरचे फुगे । उडविती ॥

शब्दारती साठी । भाट पत्रकार ।

भोवती लाचार । गोतावळा ॥

‘कांत’ क्षमता ही । जिंकू शके दिल्ली ।

लाभे ‘पाव’गल्ली । महाराष्ट्री ॥

(10 जून 2021)

उसंतवाणी- 77

(माजी केंद्रीय मंत्री माजी खासदार जितीन प्रसाद यांनी कॉंग्रेसचा त्याग करून भाजपात प्रवेश केला. उत्तर प्रदेशांतील हे तरूण नेतृत्व कॉंग्रेससाठी आशादायक होते. कॉंग्रेस पक्ष परिवाराभोवती फिरत राहिल्याने आपण भाजपात जात असल्याचे त्यांनी सांगितले. )

जितीन प्रसाद । गेले भाजपात ।

काही न ‘हातात’ । उरे म्हणे ॥

राहिला तो बडा । गेला तोची ‘कुडा’ ।

ऐसा नवा धडा । कॉंग्रेसचा ॥

सिब्बल-गुलाम । ज्येष्ठ हे तेवीस ।

झाले कासावीस । कामकाजे ॥

भाजपाचा खरा । स्टार प्रचारक ।

राहूल मारक । कॉंग्रेसला ॥

पळतो विदेशी । तरूण हा तुर्क ।

कुत्र्यामध्ये गर्क । पक्षापेक्षा ॥

सचिन बंडाचा । फुलवी निखारा ।

मिलिंद देवरा । वाट पाही ॥

‘कांत’ हवा तोची । गांधी उपेक्षीला ।

नको तो रक्षीला । कॉंग्रेसने ॥

(11 जून 2021)

उसंतवाणी- 78

(मुकूल रॉय हे मुळचे कॉंग्रेसचे. गेले तृणमुल मध्ये. तिथून भाजपात. आता परत गेले तृणमुलमध्ये. अशा कुंपणावरच्या लोकांना जास्तीचे महत्त्व दिल्याने लोकशाही कमकुवत होते. सामान्य कार्यकर्त्यांचा हिरमोड होतो.)

बंगाली जादूचा । सुरू झाला खेळ ।

परतीची वेळ । झाली म्हणे ॥

घरी परतले । मुकुल हे रॉय ।

भाजपची हाय । खावुनिया ॥

ममता कडक । घे रूद्रावतार ।

विरोधक गार । एक एक ॥

मतदारांवरी । बसवी जरब ।

म्हणे ‘‘या रब!’’ । सिद्दीकी हा ॥

नाही जुमानले । दिल्लीच्या घंटीला ।

बांधले खुंटीला । सचिवासी ॥

पक्ष सोडल्यांना । देवूनी इशारा ।

बोलवे माघारा । धूर्तपणे ॥

कांत बसलेले । कुंपणा वरती ।

तयांची भरती । कुचकामी ॥

(12 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २५

उरूस, 9 जून  2021 

उसंतवाणी- 73

(आर.बी.आय. ने सहकारी बँकांवर नियंत्रण आणले आहे. त्यामुळे महाराष्ट्रातील राजकिय सहकार लॉबी अस्वस्थ झाली आहे. शरद पवारांनी तातडीने सहकार मंत्री बाळासाहेब पाटील यांच्या अध्यक्षतेखाली एक टास्क फोर्स स्थापन केला. त्याला या संबंधात तातडीने अहवाल सादर करण्यास सांगितले आहे.)

आर.बी.आय.ने । आवळला फासा ।

सहकारी मासा । तडफडे ॥

जाणूनिया वर्म । दिल्ली करी वार ।

घायाळ प‘वार’ । कासावीस ॥

सहकारी बँका । मार्केट कमिट्या ।

दूध सोसायट्या । साम्राज्यं ही ॥

आणि कारखाने । संस्था शैक्षणिक ।

तिंबती कणीक । राजकीय ॥

ऐसी दहा तोंडे । रावणाची जरी ।

नाभी ‘सहकारी’ । जाणा खरी ॥

त्यावरी अचूक । मर्मभेदी बाण ।

राजकीय घाण । साफ होवो ॥

‘कांत’ सहकार । पिकलेले गळु ।

आता लागे गळू । तेची बरे ॥

(7 जून 2021)

उसंतवाणी- 74

(महाविकास आघाडीत धुसफुस चालू आहे. कॉंग्रेस अध्यक्ष नाना पटोले यांनी सरकार चालविणे आमची जबाबदारी नाही असे सांगून टाकले आहे. उद्धव ठाकरे फोन उचलत नाहीत अशी पवारांची तक्रार आहे.)

आघाडीच्या पोटी । बिघाडीचे यंत्र ।

लबाडीचे मंत्र । ओठावर ॥

काकाच लावती । नरडीला नख ।

जन्मदाता चोख । घात करी ॥

नाही गरजेचा । बाहेरून हल्ला ।

आतूनच किल्ला । ढासळतो ॥

पाच वर्षे नाही । टिकू दिले कधी ।

मुख्यमंत्री पदी । कुणालाच ॥

दुसर्‍या पक्षाचा । असो की स्वत:चा ।

करी लेचापेचा । नेतृत्वाला ॥

पाच वर्षे टिकू । हमी छातीठोक ।

बुरूजाला भोक । आघाडीच्या ॥

जनहिता पायी । वापरावी सत्ता ।

यांना नाही पत्ता । कांत म्हणे ॥

(8 जून 2021)

उसंतवाणी- 75

(पंतप्रधान नरेंद्र मोदींनी सर्वांना मोफत लस केंद्र देणार असल्याची घोषणा केली. तसेच 80 कोटी लोकांना दिवाळीपर्यंत धान्य पुरविणार असल्याचेही सांगितले. सातत्याने केंद्राच्या नावाने खडे फोडणारे विविध राज्यांतील विरोधी पक्षांची यामुळे खरी गोची झाली. आधी सांगितले विकेंद्रीकरण करा, मग आपत्ती व्यवस्थापन जमले नाही म्हणून ओरड सुरू केली आता सगळे केंद्रानेच हाताळले पाहिजे. आता केंद्रच सर्व ताब्यात घेणार आहे.)

मोफत राशन । मोफतच लस ।

करी ठसठस । विरोधक ॥

आधी म्हणे हवी । राज्यांना लिबर्टी ।

केंद्र करी डर्टी । पॉलिटिक्स ॥

केंद्र देई मग । संपूर्ण स्वातंत्र्य ।

जमेनाच तंत्र । आरोग्याचे ॥

दुसर्‍या लाटेचा । बसला दणका ।

तुटला मणका । व्यवस्थेचा ॥

केंद्रावर सारे । दिले ढकलून ।

मागे बोंबलून । मदत ही ॥

विरोधाच्यासाठी । केवळ विरोध ।

द्वेष मळमळ । ओठी पोटी ॥

कांत केंद्र राज्य । हवे हाती हात ।

करोनाला मात । देण्यासाठी ॥

(9 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575 

उसंतवाणी - राजकीय उपहास- भाग २४

उरूस, 6 जून  2021 

उसंतवाणी- 70

(लॉकडाउन उठणार की नाही यावर एक घोळ प्रत्यक्ष मुख्यमंत्री आणि दुसरे मंत्री विजय वडेट्टीवर यांच्या विरोधी वक्तव्यातून पुढे आला. तसेच शिक्षणमंत्री वर्षा गायकवाड आणि मुख्यमंत्री यांचीही वक्तव्यं अशीच आली.)

एक म्हणे चालू । एक म्हणे बंद ।

गोंधळाचा छंद । आघाडीला ॥

सांगे मुख्यमंत्री । त्या उलट मंत्री ।

लावुनिया ‘संत्री’ । बोलती का? ॥

प्रशासनावर । पकड हो सैल ।

जू सोडूनी बैल । चाललेले ॥

ढकलली पोरे । न घेता परिक्षा ।

आघाडीची रिक्षा । तैसी चाले ॥

दोन मंत्री गेले । एक वाटेवर ।

काय खाटेवर । कुरकुरे ॥

‘सिल्व्हर’ भेटीचे । चमके पितळ ।

चाले खळबळ । मातोश्रीला ॥

‘कांत’ या सत्येचा । अनैतिक पाया ।

लागला ढळाया । तोल हिचा ॥

(4 जून 2021)

उसंतवाणी- 71

(विधानपरिषदेवर नेमायचे 12 आमदार अजून अडकूनच पडले आहेत. राज्यपालांशी विनाकारण घेतलेल्या पंग्याने महाविकास आघाडी सरकार स्वत:च अडचणीत सापडले आहे.)

राजकिय डाव । उलटला सारा ।

आमदार बारा । अडकले ॥

आढ्याला टांगले । शिंकोळ्यात लोणी ।

हातावर कोणी । देईचीना ॥

रोकले विमान । केला अपमान ।

दिली उगा मान । हातामध्ये ॥

अस्वस्थ खडसे । आणि राजू शेट्टी ।

दोघांचिही शिट्टी । वाजविली ॥

गप्प राज्यपाल । ऐसे कोशियारी ।

दावी होशियारी । नियमांची ॥

आशेला लागले । पुरोगामी सारे ।

लाचारी पाझरे । लेखणीतूनी ॥

कांत परिषद । करा बरखास्त ।

भ्रष्ट गड ध्वस्त । बांडगुळी ॥

(5 जून 2021)

उसंतवाणी- 72

(आशुतोष मिश्रा यांनी टाईम्स नाउच्या चर्चेत सेंट्रल विस्टा प्रकल्पाला ‘मोदी मकबरा’ अशी असभ्य भाषा वापरली. ज्या पद्धतीने कोरोना आपत्तीत देशाची बदनामी करण्याची मोहिम मोदि विरोधात हाती घेतली गेली आहे ती संपूर्णत: निषेधार्ह आहे. )

निर्लज्ज होवूनी । बोले चराचरा ।

‘मोदी मकबरा’ । लिब्रांडू हा ॥

चॅनल चर्चेचा । कुच्चर हा वट्टा ।

रोज ऐसी थट्टा । नॅशनल ॥

राजस्थानामध्ये । चाले बांधकाम ।

कराया आराम । आमदारा ॥

त्यावरती नाही । बोलती भाडोत्री ।

मालकाची कुत्री । भुंकणारी ॥

स्मारकास जागा । सरकारी पैसा ।

कॉंग्रेसचा ऐसा । डाव असे ॥

समाजवादाचे । रूप हे सर्कारी ।

लुटते तिजोरी । जनतेची ॥

कांत ढोंगावर । मोदी करी घाव ।

चाले काव काव । पुरोगामी ॥

(6 जून 2021)

श्रीकांत उमरीकर, जनशक्ती वाचक चळवळ, औरंगाबाद 9422878575